16 декабря 2015 г.
Раççей спорт кĕрешĕвĕн федерацийĕн пĕрремĕш вице-президенчĕ Омар Муртузалиев çĕршывăн хĕрарăмсен кĕрешĕвĕн историйĕнче Чăваш ен пĕр залра пуçласа 5 пин куравçăна пухнине палăртнă. Çак сăмахсене вăл Чăваш ен Пуçлăхĕн Михаил Игнатьевăн парнисемшĕн хĕрарăмсем хушшинче иртнĕ Раççей Кубокĕн спорт-концерт шоувĕнче каланă.
Финал умĕнхи церемонире Михаил Игнатьев хĕрарăмсен кĕрешĕвĕ Олимп вăййисен тĕсĕ пулнине, Чăваш енре виçĕ пин ытла ача унпа кăсăкланнине палăртнă.
Сумлă ăмăртăва Чăваш ен виççĕмĕш çул харăс ирттерет. Кăçал кавир çине пилĕк çĕршыври (Раççей, Монголи, Казахстан, Азербайджан тата АПШ) 119 спортсмен тухнă, 8 комплект медальшĕн тупăшнă.
Шел те, Чăваш енрен шанăç кĕтнĕ Наталья Гольц çĕнтерÿçĕ медальне тивĕçеймен. Унăн – кĕмĕл медаль.
Раççей хĕрĕсен пĕтĕмĕшле пилĕк ылтăн. Командăпа вĕсем чи вăйлисем пулнă. Регионсем хушшинче çĕнтерÿçĕсем – Мускав хулин пĕрлештернĕ команди.
Ю.Львов,
Вăрнарти ачасемпе çамрăксен спорт шкулĕн тренер-преподавателĕ, Раççей Кубокĕн судйи:
– Пысăк, урăх шайри ăмăрту. Республикăри çамрăк кĕрешÿçĕсене вĕренмелли чылай пулчĕ. Çавăнпах унта Вăрнар спортсменĕсене те çитме майсем шырарăмăр. Суйласа илнĕ спорт тĕсĕнче тăрăшса ăсталăха туптасан пирĕн район хĕрĕсен те ку шайри турнира хутшăнма шанăç пур. Историре Вăрнар хĕр-кĕрешÿçисем тĕнче ăмăртăвĕсене хутшăнса палăрнă тĕслĕхсем те пур: Ирина Данилова, Алена Федорова, Ирина Львова...