12 декабря 2015 г.
Чăваш Республикин 2016 çул валли хатĕрленĕ бюджетне Патшалăх Канашĕн черетлĕ сессийĕнче йышăннă. Республика Пуçлăхĕ Михаил Игнатьев палăртнă тăрăх, кăçал Раççейĕн Финанс министерствипе тачă çыхăнса ĕçлени федерацирен хушма укçа илме май панă. Çак кунсенче тата 2016 çул валли те Чăваш ене Мускав хушма укçапа пулăшма йышăннă: федераци бюджетĕнчен пыракан лимита пĕтĕмпе 1,4 млрд тенкĕлĕх ÿстернĕ, çав шутра – 768,5 миллионĕ – бюджет кредичĕ, вăл коммерци кредичĕсене саплаштарма каять, 647 миллионĕ – тавăрса памалли мар укçа.
Çавăн пекех Михаил Игнатьев Шупашкарти онкологи диспансерĕн хирурги уйрăмне тума 363,517 млн тенкĕ каясса пĕлтернĕ. Ку объекта çитес çулхи авăн уйăхĕ тĕлне хута ямалла. Унсăр пуçне 155 млн тенкĕ вăрçă ветеранĕсене çурт-йĕрпе тивĕçтерме кайĕ, 116,104 миллион – республикăн агропромышленноç комплексне аталантарма.
«2016 çул финанс тĕлĕшĕнчен ансат пулмĕ. Республикăри предприятисем йывăрлăхра ĕçлеççĕ. Çавăнпа мĕнпур ресурса пĕтĕçтермелле, бюджет укçин кашни тенкипе тухăçлă усă курмалла», – палăртнă Чăваш ен Пуçлăхĕ.