09 декабря 2015 г.
Шупашкарта декабрĕн 1–4-мĕшĕсенче рабочи профессин сумлăхне ÿстерес тата професси вĕренĕвне аталантарас тĕллевпе иртнĕ WorldSkills Russia чемпионатра Малти Ишек хĕрачи «Чи пысăк ăсталăхшăн» медале тивĕçнĕ.
Настя Петрова унта тăван вĕренÿ учреждени – Вăрнарти ял хуçалăх техникумĕн чысне хÿтĕленĕ. Пĕрремĕш кунне хăй хатĕрленĕ фаршланă пастăпа усă курса вĕри закуска, кайăк ашĕнчен вĕри апат тата пахчаçимĕç десерчĕ; иккĕмĕш кунне икĕ тĕслĕ фуршет закуски, пахчаçимĕçрен яшка-крем тата десерт пĕçерсе тĕлĕнтернĕ.
Светлана Александровна Казанковапа Татьяна Георгиевна Гаврилова преподавательсем – конкурсанткăн наставникĕсем – Настя професси тупăшăвĕнче палăрса ытти студентшăн та тĕслĕх пулса тăнине палăртаççĕ.