05 декабря 2015 г.
«Химик» спорт клубĕн футболисчĕсен пысăк уява пухăнма, сумлă хăнасене (Чăваш Республикин физкультура министрне Сергей Шелтукова, футбол федерацийĕн президентне Михаил Богоратова, «Август» Фирмăн генеральнăй директорне Александр Ускова, Вăрнарти филиалĕн ертÿçине Владимир Свешникова, район администрацийĕн пуçлăхне Леонид Николаева) чĕнме кăçал та сăлтавĕ курăмлă пулчĕ – «Химик-Августăн» тĕрлĕ ÿсĕмри командисем Чăваш ен турнирĕсенче чи çÿлти йĕркесене йышăнчĕç: ачасем – иккĕмĕшĕнче, кĕçĕн каччăсем – виççĕмĕшĕнче, аслă каччăсем – иккĕмĕш çул республика первенствин çĕнтерÿçисем тата Чăваш ен Кубокĕн финалисчĕсем, тĕп команда – республика чемпионĕ тата Чăваш ен Кубокĕн финалисчĕ.
– Пурнăçа çĕнтерес туйăмпа пуçлани пĕлтерĕшлĕ, çакă тĕлĕнмелле вăй парать, – терĕ Александр Усков сцена çине хăпарнă чи кĕçĕн спортсменсене медальсем çакас умĕн компани хăйĕн тĕп сферине шăпах çак ĕмĕтсемпе пуçланине палăртса. Ÿсĕмĕ нумай кĕттермен – ÿсентăрансене хими мелĕпе сыхлакан хатĕрсем кăларас сферăра вăл çĕршывра лидерсен йышĕнче. «Иккĕмĕш вырăн пулин те ку – сирĕншĕн пĕрремĕш çĕнтерÿ. Çитес çул сире пĕрремĕш вырăншăн тискер чĕрчунсем пек кĕрешме ăнăçу сунатăп», – терĕ вăл.
Кунашкал тĕслĕх республикăра урăх çук – «Август» Фирма спорта, уйрăмах футбол аталанăвне, çав тери пысăк тимлĕх уйăрать. Çак уяв та ку предприятире ĕçлеме пултарнине çеç мар, спортпа туслă пулнине, çĕнтерĕве чаплăн паллă тума пĕлнине кăтартса пачĕ. Футбол чăннипех те вăйă çеç мар. Вăл – çивĕч тупăшу, çирĕп туслăх, хутшăнусем, тĕрлĕ ăру çыхăнăвĕ. «Эсир – пĕрлĕхлĕ команда, социаллă тĕллевлĕ бизнеса тытса пынипе ачасене медальсем çĕнсе илме хавхалантаратăр çеç мар, чи кирли – сывă ăру çитĕнтеретĕр», – палăртрĕ физкультура министрĕ Сергей Шелтуков.
Кăçалхи сезонра уйрăмах аслă ушкăнрисем тĕлĕнтерчĕç. Республика первенствин чемпионĕн ятне ку хутĕнче вĕсем срокчен маларах тивĕçрĕç. Вунă командăна та парăнтарнă, 17 вăййа çĕнтерÿпе вĕçленĕ, 87 гол тапса кĕртнĕ.
Паллах, кашни команда чи пысăк хисепе тивĕç. Вĕсем «Химик» спорт клубĕн ятне кăна мар, Вăрнар ятне çÿле çĕклеççĕ. Поселок каччин Роман Шалинăн акă ытти çулсенчи титуллă çитĕнĕвĕсем çумне «Чи лайăх тапăнса вылякан» ят хушăнчĕ, 2015 çулта вăл Раççей первенствин Атăл тăрăхĕнчи лигинче «Чи лайăх снайпер» пулса тăчĕ.
Залра ларакансен, ахăртнех, кашни футболистшăн чунĕ хăпартланчĕ – пур команда та вăл е ку турниршăн Кубокпа дипломсене тивĕçрĕ. Кашни спортсмен – медале тата хаклă парнесене. Лайăххисенчен чи лайăххисем вара – ятарлă статуэткăсене. Ростислав Петров, Евгений Григорьев, Вадим Рыбкин, Дмитрий Мошкин, Дмитрий Прокопьев, Антон Антонов, Кирилл Герасимов, Евгений Марков, Виталий Крылов, Роман Сорокин, Денис Павлов, Игорь Солнцев, Артем Мищенко, Максим Спинов, Роман Шалин – акă вĕсем кăçалхи чи ăста футболистсем: кам чи лайăх хÿтĕлевçĕ, кам чи лайăх çурмахÿтĕлевçĕ, кам чи пултаруллă тапăнса вылякан, кам чи лайăх вылявçă.
Ку çитĕнÿсенче, паллах, тренерсен ăсталăхĕпе ăс-тăн хывăмне палăртмасăр иртме çук: Александр Строганов, Геннадий Герасимов, Александр Балыбердин, Дмитрий Григорьев – мухтавлă тренерсен ячĕсене вăрнарсем пĕлме тивĕç. Çавăн пекех футболшăн хыпса çунакан, районта ун ĕмĕрне тăсассишĕн хыпăнакан çынна: Евгений Захарова, «Химик» спорт клубĕн директорне.
Футбол – пĕтĕм халăх вăййи тесе ахальтен каламан ĕнтĕ. Çуллахи вăхăтра килти вăйăсенче «Химик» стадион «чирлекенсемпе» самаях тулать. Мошкинсем акă ку таранччен Вăрнарти вăйăсене те, Шупашкартине те, Хусантине те, Саранскрине те пĕрне те сиктермен. Светлана Рыбкинана вара футболистсем талисман вырăнне хураççĕ, вăл стадиона килнĕ-тăк – вăйă та ăнăçать.
Пĕрле эпир вăйлăрах. Футбол уявĕ валли çак слогана ахальтен суйласа илмен – спортри, ĕçри пĕрлехи çитĕнÿсем кирек мĕнле компани вăй-халне ÿстереççĕ. Залра ак футбола кăмăллакан çынсем, сцена çинче – пуçĕпех спортăн ку тĕсне парăннисем. Чыславсем хушшинчи номерсем те (фитнес-аэробика ушкăнĕ, мечĕк виртуозĕсем-футбол фристайлерĕсем, «Студлайф» юрăçисем...) пĕр тĕвве пĕрлешрĕç: футбол – пурнăç тĕллевĕ. Тавраллах çак сывлăш хуçаланчĕ. Фойере ачасем сĕтелçи футболĕнче вăй виçрĕç, залра речĕпе йышлă Кубоксем – химиксен çитĕнĕвĕсем, кунтах – футбол атрибутики, фотостенд. Ку уяв вĕçленни пирки Максим Орешкин шăхличпе шăхăртрĕ пулин те чунсенче савăнăç туйăмĕ сÿнмерĕ. Тепреччен, стадионта тĕл пуличчен!
Светлана ЧИКМЯКОВА.