02 декабря 2015 г.
Хаçатăн иртнĕ номерĕнче пирĕн ентеш Валерий Кошкин Константин Симонов поэт 100 çул, Аслă Çĕнтерÿ 70 çул тултарнине халалласа ирттернĕ Пĕтĕм тĕнчери литература конкурсне хутшăннине пĕлтернĕччĕ. Ноябрĕн 27–28-мĕшĕсенче Белоруссири Могилев хулинче литература тупăшăвĕнче мала тухнă писательсемпе поэтсене чысланă. Жюри тĕрлĕ çĕршывсенчи 500 ытла автортан суйласа илнĕ, ыттисенчен пултаруллăрах çырнă ĕçсене тивĕçлĕ хак панă.
«Поэзи» номинацире аслă ăрури çыравçăсем хушшинче çĕнтернисен ячĕсене каланă чухне «Кошкин Валерий Павлович, Раççей Федерацийĕ, Чăваш Республикин Вăрнар районĕнчи Хăмăш ялĕ, «Восстание в Бадабере» тата «Судьба, прошу...» хайлавсем – иккĕмĕш вырăн! Тĕлĕнмелле чунлă сăвăсем – кашни йĕркинче патриотизм вăйĕ тапса тăрать! Çулĕ çывăх мар та авторĕ килсе çитеймерĕ пулас» тесе пĕлтернĕ, зала пухăннисем пирĕн ентеше тăвăллăн алă çупса саламланă.
Уява ертсе пыракансем поэт пурăнакан хула «Шупашкар» тесе палăртни вырăнне биографири пĕрремĕш йĕркере кăтартнă çуралнă Хăмăш ялĕн, тăван Вăрнар районĕн, Чăваш Республикин, Раççей Федерацийĕн чыс-мухтавне çĕклени ентешсемшĕн хаклăрах та, сăваплăрах та янăрать.