28 ноября 2015 г.
Чăваш енре виçĕ çын метил спирчĕпе наркăмăшланса вилнĕ. Ку тĕлĕшпе уголовлă ĕç пуçарнă. Метил спирчĕ çав çынсем ĕçнĕ алкогольре пулнă-мĕн.
Следстви пĕлтернĕ тăрăх, чÿк уйăхĕн 7-мĕшĕнче 20 çулти хĕрпе унăн 22-ри савнийĕ (Вăрнар районĕнчен) тара илсе пурăннă хваттерĕнче «Bacard Blak» этикеткăллă ром ĕçнĕ. Тепĕр кунхине иккĕшне те япăх пулнă, вĕсене больницăна ăсатнă. Анчах тухтăрсем çамрăксен пурнăçне çăлайман.
Ноябрĕн 7-мĕшĕнче Шупашкар районĕнчи Ишлейре пурăнакан 30 çулхи хĕрарăм тусĕн çуралнă кунĕнче çав алкоголех ĕçнĕ. Тепĕр кунхине ăна та больницăна ăсатнă. Анчах вăл та темиçе кунран вилнĕ.
Экспертиза палăртнă тăрăх, виççĕшĕ те метил спирчĕпе наркăмăшланса вилнĕ. Халĕ унпа наркăмăшланнă тепĕр çын та пур. Вăл, 36-рискер, больницăра выртать.
Ку ĕçре Шупашкарти пĕр коммерци директорĕ, унăн амăшĕпе еркĕнĕ тата пĕлĕшĕ вилнĕ 30 çулхи хĕрарăмăн упăшки, айăплă тесе шутлаççĕ. Шырав вăхăтĕнче 900 ещĕк суррогатлă алкоголь туртса илнĕ.
Юлашки вăхăтра çынсем суррогатлă алкогольпе наркăмăшланасси йышланчĕ. Саккуна хирĕçле çак «бизнес», шел пулин те, хăйĕн çаврăнăшне ÿстерсе пырать. Нумаях пулмасть Мускав облаçĕнче çынсем вилнĕччĕ, хальхинче вара Чăваш енре виçĕ çамрăк çыннăн пурнăçĕ татăлнă. Çакă, суя алкоголĕн саккунсăр çаврăнăшне шута илсен, питĕ çивĕч ыйту, пиншер çыннăн пурнăçĕшĕн хăрушлăх кăларса тăратать. Граждансене иккĕленÿллĕ вырăнта, алăран алкоголь продукцийĕ туянасран асăрхаттарасшăн. Хаклă брендсен, чаплă эрехсен маркипе усă курса наркăмăшлă шĕвек те сутма пултараççĕ, асăрханăр!
В.МАРКИН,
РФ Следстви комитечĕн МИХсемпе çыхăну тытакан управленийĕн ертÿçи.