28 ноября 2015 г.
Хальхи вăхăтра граждансем патшалăх тивĕçтерĕвĕсене ансатлатнă йĕркепе илме пултараççĕ, вăл шутра – Шалти ĕçсен Чăваш енри министерстви енĕпе те.
Ку органăн официаллă сайтĕнче мĕнпур информаци пур. Çавăн пекех «Электронное МВД» баннерта килтен тухмасăрах заявлени çырма май пур.
Çавăн пекех министерствăра (Шупашкар хули, К.Маркс ур., 41-мĕш çурт) йышăну пÿлĕмĕ уçнă. Кунта тăватă тивĕçтерĕве илме пулать. Чи анлă сарăлни – судпа айăпланнипе айăпланманни çинчен справка илесси. Унсăр пуçне çынсем архив справкисене, политика репрессине лекнипе хут, апостиль лартма ыйтса çыраççĕ. Патшалăх тивĕçтерĕвне 30 кунран кая юлмасăр параççĕ.
Министерствăн дежурнăй пайĕн линийĕпе те тĕрлĕ ыйтусене татма май пур: преступленисем пирки е ытти информацие йышăнасси, регистрацилесси, татса парасси. Заявленисене çырма www.gosuslugi.ru сайта кĕмелле те «Подать заявление в электронном виде» опцие пусмалла, кирлĕ органа суйласа илмелле тата ытти те. Анчах та тĕрĕс информаци тăратмалла, усал сăмахсемпе вăрçса, уйрăм е должноçри çынсене, вĕсен çемйисене хăратса çырнă заявленисене пăхса тухмаççĕ.
Лицензипе ирĕк парас линипе 27 тĕрлĕ тивĕçтерÿ илме пулать: пăшал туянма, йăтса çÿреме тата упрама лицензи, уйрăм хурал сотрудникĕн удостоверенине илес тата ытти енĕпе. 17 тивĕçтерĕве электронлă майпа илме пулать. Пĕрлехи порталта регистрациленмелле çеç. ИНН тата пенси свидетельствисен номерĕсем кирлĕ. Ятарлă страничкăра активаци кодне илессине пурнăçламалла. Раççей почти урлă ăна икĕ эрнерен ярса параççĕ, Ростелеком центрĕнче (Шупашкарта) вара паспорт тата пенси свидетельстви çумра пулсан çав кунах пĕлме май пур. Порталта регистрациленсен уйрăм пÿлĕмре заявка тăратмалла та.
Çул-йĕр патшалăх инспекцийĕн линийĕпе Интернет урлă автотранспорт хатĕрĕсене тата вĕсен прицепĕсене регистрацилеме; автомототранспорт хатĕрĕсемпе усă курма квалификаци экзаменне тытма, водитель удостоверенине илме; административлă йĕркене пăсни çинчен сведенисем илме май пур.
Электронлă порталпа усă курни граждансене хăйсен вăхăтне перекетлеме пулăшать, тĕрлĕ органсем тăрăх документсем пуçтарса çÿрессинчен хăтарать.
Н.МИХНЕВА,
полицин «Вурнарский» пайĕн ĕç производствин
тата режим ушкăнĕн инспекторĕ-ертÿçи.