21 ноября 2015 г.
Налук службин районти ĕçченĕсем професси кунне тата чĕрĕк ĕмĕр юбилейне тĕплĕн хатĕрленни сисĕнет. Уяв туйăмĕпе çунатланни, ăна лайăх кăтартусемпе кĕтсе илни социаллă сетьсенче анлă курава тивĕçнĕ флешмоб та аван çирĕплетрĕ.
Налук тÿлекенсем вара инспекци пÿлĕмĕсен дизайнĕнчи улшăнусене ырласа палăртрĕç. Служба йĕркеленнĕренпе 25 çул çитнĕ май, кунта çынсене йышăнма çĕнĕ операци залĕ уçăлчĕ.
Юнкун ку пулăмпа çыхăннă мероприятире, хĕрлĕ хăйăва каснă май, Раççей Федераллă налук службин республикăри управленийĕн ертÿçи Алексей Краснов, район администрацийĕн пуçлăхĕ Леонид Николаев, районсем хушшинчи 3-мĕш инспекци пуçлăхĕ Юрий Егоров паянхи стильпе çĕнелнĕ зал чи малтанах халăх хăтлăхĕшĕн пулнине палăртрĕç.
1-мĕш хутра халĕ унчченхи хĕсĕк коридорпа хĕсĕк пÿлĕмсем çук ĕнтĕ. Вĕсене пĕрлештерсе пысăк, уçă хутлăх йĕркеленĕ. Паллах, налук тÿлекенсене йышăнмалли чÿречесен шутне сыхласа хăварнă, вĕсем малтанхиллех тăваттă. Стендсем çинче – налукпа çыхăннă тулли информаци. Клиентсене кĕтме меллĕ дивансем, тăрса, ларса çырма сĕтелсем вырнаçтарнă. Çынсем çавăн пекех кирлĕ информацие ятарласа лартнă компьютерта тупма пултараççĕ. Тĕрĕслевпе касса техники валли уйрăм вырăн уйăрнă.
Малашлăхра кунта «электронлă черет» комплексĕ те ĕçлесе кайĕ. Черетри кичемлĕхе пусарма телевизор ĕçлеме пуçлĕ.
Районсем хушшинчи 3-мĕш налук инспекцийĕн тивĕçтерĕвĕн шутĕнче паян юридици сăпатĕнчи 652, уйрăм сăпатри 89010 çын, 1335 уйрăм предприниматель.
Кăçалхи вунă уйăхра мĕнпур шайри бюджетсене 943,3 млн тенкĕ налук хывнă, пĕлтĕрхи ку тапхăртинчен 39,7 процент ытларах.
Уяв умĕнхи пулăм тепĕр ырă самантпа та çыхăнчĕ. Район администрацийĕн пуçлăхĕ Леонид Николаев инспекци пуçлăхне Юрий Егорова, ĕçченĕсене – Андрей Матвеева, Наталия Михайлована, Юрий Бусурманова Хисеп грамотисемпе чысларĕ.
С.ЧИКМЯКОВА.