21 ноября 2015 г.
Тĕнчере хуçаланакан паянхи кăткăс лару-тăрура çак туйăмсене пĕчĕкрен хăнăхтарни уйрăмах пĕлтерĕшлĕ. Çавăнпах-тăр Вăрнарти 3-мĕш «Ромашка» ача садĕнче иртнĕ ашшĕ-амăшĕн пухăвĕнче учреждени ĕç-хĕлне пĕтĕмлетнипе пĕрлех çак темăсене те пысăк тимлĕх уйăрчĕç.
Патриотизм туйăмне аталантарассине наци йăлисене, наци чĕлхине, наци пуянлăхне сыхласа хăварассипе çыхăнтарчĕç. Чăваш тумĕ тăхăннă ачасен кăтартуллă номерĕсем чăвашла янăрарĕç. Хамăрăн аслă классикăмăрăн Константин Ивановăн вилĕмсĕр поэма сыпăкĕсем, вăл куçарнă сăвăсен йĕркисем шăранчĕç. Вĕсене Раççейри Литература, Чăваш енри К.В.Иванов çулталăкне халалларĕç. Валентина Коновалова воспитатель патриотлăх ача тăван киле, тăван ача садне, тăван поселок-яла юратнинчен пуçланнине палăртрĕ.
Хăрушсăрлăх темине хускатни те ăнсăртран мар. Раççей самолечĕпе çыхăннă, Парижри террорла ĕçсем тĕнчене кисретрĕç. Çавăнпа та садик заведующийĕ Ирина Антонова ачасен хÿтлĕхне пур енлĕн тивĕçтермеллине палăртрĕ.
Паянхи куна ача садне 163 арçын ачапа хĕрача çÿрет. Вĕсен пĕлĕвĕпе воспитанийĕшĕн кунта 30 ĕçчен тăрăшать. Учреждени кĕçĕннисен сывлăхне çирĕплетессине те тĕпе хурать, ку енĕпе районти «Малышиадăра» – пĕрремĕш.
Çĕнĕ вĕренÿ çулне пысăк юсавпа кĕтсе илнĕ, пÿлĕмсене, площадкăсене çĕнетнĕ.
С.ЧИКМЯКОВА.