18 ноября 2015 г.
Вăрнарти физкультурăпа спорт комплексĕнче эрнекун баскетбол енĕпе иртнĕ «КЭС-Баскет» район первенствинче Вăрнарти 1-мĕш, Ярмушкари, Аçăмçырминчи, Кĕçĕн Кипекри, Кульцаври, Калининăри, Вăрман Кипекри, Кÿстÿмĕрти, Хапăсри шкул командисем вăй виçнĕ. Чи çивĕччисем поселокри шкул ачисем пулнă. Кÿстÿмĕрсем – иккĕмĕш, хапăссем– виççĕмĕш.
Шăматкун вара сывă пурнăç йĕркин тусĕсем депутатсен район Пухăвĕн депутачĕн, «Энергомонтаж» общество директорĕн Рифкат Киметовăн парнисемшĕн ИРĔКЛĔ КĔРЕШŸРЕ тупăшнă.
Ку – депутат пуçарăвĕпе йĕркеленĕ пĕрремĕш турнир. Анчах та, пĕлетпĕр ĕнтĕ, Рифкат Шамдинович спорта аталантарассине сахал мар тÿпе хывать. Юлташлă мини-футбол турнирĕсем йĕркелет, тĕрлĕ ăмăртусенче çĕнтерÿçĕсене хавхалантарать.
Тĕрлĕ виçе категорийĕнче кавир çине 115 спортсмен тухнă. Чемпионсем çаксем – Максим Иванов, Юля Константинова (2-мĕш шкул), Кирилл Андреев, Владимир Терентьев (1-мĕш шкул), Роман Сафронов, Алексей Антонов, Антон Федоров, Артем Андриянов, Диана Дмитриева, Виктория Орлова, Эвелина Яковлева, Ангелина Егорова (Санарпуç).