11 ноября 2015 г.
Вăрнар каччи 2015 çулхи «Чи лайăх тапăнса вылякан» ята ăнсăртран çĕнсе илмен. Темиçе çул ĕнтĕ вăл «Химик – Август» командăн тĕп шăнăрĕ шутланать.
Лауреат ятне Роман Шалин кăçал пуçласа илнĕ. Ку сезонра унăн 21 гол, виçĕ гол пасĕ. Ытти çулсенче те Роман вăйăсенче пĕрре мар тĕлĕнтерчĕ. Тĕп вăйăра та, пенальтипе те командăна çĕнтерÿçĕ пулма чылай пулăшнă. Ун шутĕнче, 70 ытла гол, шăхлич янăриччен тапса кĕртнĕ очкосем те чылай.
Вăрнар каччин футболти çăлтăрлă çулĕ ачаранах хывăннă. Хăй вăхăтĕнче аслă ачасем хушшинче республикăн бронза призерĕ пулнă. Тĕп командăпа – темиçе хутчен те Чăваш ен чемпионĕ, Чăваш ен Кубокĕн темиçе хутчен, Суперкубок çĕнтерÿçи. 2011 çулта – республика чемпионачĕн аслă дивизионĕнче Чăваш ен кубокĕн чи лайăх бомбардирĕ.
Номинантсен йышĕнче çавăн пекех футболистсен тренерĕн Александр Балыбердинăн ячĕ те пур.
Каламалла, Вăрнар футболисчĕсем кăçалхи сезона ăнăçлă вĕлерĕç. «Химик–Август» аслă дивизионра, аслăрах каччăсен, кĕçĕн каччăсен, ачасен турнирĕсенче – малти вырăнсенче. Пĕрлехи зачетра та пĕтĕмĕшле суммăпа – чи çÿллĕ йĕркере.
«Химик» стадион – яланхиллех чи лайăххи. Ку ят ăна çиччĕмĕш хут тивĕçнĕ.
Чăваш ен футбол федерацийĕн канашĕ çĕнтерÿçĕсене, номинантсене Шупашкарти «Олимпийский» стадионта чысланă.
С.ЧИКМЯКОВА.