07 ноября 2015 г.
170 çулне уявлакан Калинино шкулне çак кунсенче тулли кăмăлпа аса илетĕп. Унтан вăтам пĕлÿ туянса тухнăранпа 60 çул иртрĕ пулин те, учительсем, пĕрле вĕреннисем çаплах куç умĕнче тăнăн туйăнаççĕ. Директора, паллă, ятлă-сумлă педагога Иван Степанович Нарышкина, хамăрăн класс руководительне – фронтовика тата çар чĕлхин куçаруçине Венямин Павлович Кузнецова манаймастăп. Иккĕшĕ те çав тери тирпейлĕ, стайлă çÿретчĕç, ăмсанмалла капăр тумланатчĕç. Манăн воспитательсем, ÿснĕçемĕн пĕлÿпе ăс-тăн пиллекенсем шкулта та, Совет Çарĕнче те, институтра та фронтовиксем пулнăшăн мăнаçланатăп, мĕнпур вĕрентекенĕмсене пуçăма тайса тав тăватăп. Вĕсем питĕ шанчăклă юлташсемччĕ: эпир вĕсене, вĕсем пире чунтан хисепленĕ, никам та сăмахпа пустуйран выляман, суеçтерсе калаçма пултарайман. Шел, шкул пĕтернĕренпе 50 çул çитнине уявлама унчченхи пысăк йышран пурĕ те 14-ăн çеç пухăнтăмăр. Ветерансем чылайăшĕ пурнăçран уйрăлнă. Тантăшсем хушшинче – çар летчикĕ, службăра 16 çул Байконур космодромĕнче тăнă Кудрявцев, халь вăл Мускавра пурăнать, сăвă-калав кĕнекисем кăларать, РФ Писательсен пĕрлешĕвĕн членĕ* шалти çарсен запасри подполковникĕ Чернов. Петр Максимович Кожанов агроном ,çлĕх Хĕрлĕ Ялав орденне тивĕçрĕ, паян кун та пурăнмаллаччĕ, анчах врачсен йăнăшне пула пиртен сасартăк уйрăлчĕ. Ачинскра тĕпленнĕ Соколов кун-çулне тĕслĕ металлургипе çыхăнтарчĕ. Марковăпа Николаева – учительсем. Михайловăпа Петров – строительсем. Лукин бухгалтер-экономист. Гаврилова Инçет çурçĕрте ĕçлерĕ. Отставкăна тухнă Моисеев подполковник Иркутскра пурăнать...
Мăньял Хапăсран Нурăса вун икĕ çухрăм çуран утнă. Хĕллехи çул çинче кашкăрсен эшкерĕ тухса тăратчĕ те улăм кĕлти çунтарнипе аранах хÿтерсе яраттăмăр.
Шкулăн хальхи директорĕ, республикăн тава тивĕçлĕ учителĕ, «Тăван Çĕршыв умĕнчи тава тивĕçлĕ ĕçсемшĕн» медалĕн кавалерĕ Татьяна Павловна Ефимова мониторпа кăтартма пултарнăран юбилей кунĕнче пирĕн учительсем речĕпех чĕррĕн куç умне тухрĕç: Харитон Александрович, Григорий Николаевич, Анна Дмитриевна, Анна Алексеевна, Серафима Федоровна, Илья Иванович, Иван Михайлович, Геннадий Петрович... Вĕсем пире пурнăç çулĕ çине хăйсем пекех çирĕппĕн тăма хăнăхтарнă.
ÿсĕмри ăрупа ĕçлеме пĕрре те çăмăл мар. Кашни ача хăйне евĕр. Тайлăкраххисене виçĕ хут, вунă хут каласа ăнлантарма уроксем хыççăн тытса хăварнă. Анна Дмитриевна, Ленинград вырăсĕ, чăвашла вĕренчĕ, вăл акцентпа калаçнинчен кулкаланăшăн каярахпа хама ырă мар туяттăм. Каçару ыйтмаллаччĕ те – ĕлкĕреймерĕм...
Икĕ хутлă йывăç çуртра лараттăмăр. Икĕ сменăпа вĕреннĕ. Арçын ачасене класри отличницăсем хавхалантарнă, Борис Алексеевич Еремин калашле, вĕсенчен юлма юраман. Хамăртан кăштах кăна аслăрах Зинаида Ивановна капашсăр илĕртÿллĕн утса çÿренине ăмсанаттăмăр, хăйне юратнăран унăн химине те класĕпех килĕштернĕ. Учительсем пирĕншĕн чи сăпайлă, тирпейлĕ çынсем шутланнă. Калининăри вăтам шкул коллективĕ директорĕнчен тĕслĕх илсе тÿрĕ кăмăлпа туслă пурăнма тăрăшать, çуллен çитĕнÿсемпе савăнтарать.
В.КОЖАНОВ.