03 ноября 2015 г.
Антибиотиксем пирки пĕлмен çын çук. Вĕсемпе усă курнин тĕллевĕ – сиенлĕ микроорганизмсене пĕтересси. Уйрăмăнах чир пуçламăшĕнче асăрханмалла. Антибиотик малтанхи пĕр-икĕ талăкра пулăшаймасть пулсан, ăна улăштарма тивет. Паллă ĕнтĕ, антибиотиксем, çапах та, сиенлĕ микробсемсĕр пуçне кирли-усăллисене те пĕтереççĕ.
Хальхи вăхăтра выльăх-чĕрлĕх патĕнче пробиотиксемпе усă кураççĕ. Вĕсем чĕрĕ бактерисенчен тăраççĕ, выльăх ăшчикне лексен, сиенлĕ микроорганизмсене пĕтереççĕ, çав хушăрах микрофлорăна сиен кÿмеççĕ.
Анчах çуралнă çамрăк выльăх-чĕрлĕхĕн вар-хырăмĕ çителĕклĕ аталанса çитмен пирки малтанхи тапхăрта чирлесси пысăк шайра пулнине астумалла. Çав вăхăтра пыршăсенче микрофлора çук. Апатпа, шывпа лекнĕ бактерисем хăвăрт хунаса каяççĕ, вар-хырăма чир аптăратать. Хальхаççăн пробиотиксемпе анлăн усă курма пуçларĕç. Вĕсем тĕрлĕ микроорганизмран – йÿçнĕ сĕт бактерийĕсенчен, çĕпре культуринчен, целлюлоза бактерийĕсенчен тата ыттисенчен те тăраççĕ.
Б.ЛЕОНТЬЕВ,
Кăмаш ветучастокĕн врачĕ.