03 ноября 2015 г.
Кĕрперен хатĕрленĕ апат-çимĕç – вăй-хал тата усăллă япаласен çăлкуçĕ! Пăтă тата ытти апат-çимĕç уйрăмах хĕлле кирлĕ теççĕ. Углеводпа пуянскер, пирĕн организма кĕрĕкрен япăх мар ăшăтма пултарать иккен. Специалистсен шухăшĕпе нумай кĕрпе организмран холестерин кăларма пулăшать, чĕре, çавăн пекех пĕвер, хырăмлăх-пыршăлăх ĕçне лайăхлатать.
Паллах, пахалăхлă кĕрпен çеç усси пысăк. Шел те, лавкка сентрисем çинчи пур кĕрпене те лайăх тееймĕн. Россельхознадзорăн республикăри управленийĕн инспекторĕсем кăçалхи çур çулта кăна пахалăхсăр тата хăрушă 0,189 тонна кĕрпе тупса палăртнă. 0,157 тонна утилизацилеме тивнĕ. Сăмахран, хăвăрт пиçекен хуратул (0,057 тонна) ГОСТ требованийĕсене тивĕçтермен: сăтăрçăсем пулнă, нÿрĕклĕх кирлĕ шайра мар. Рис кĕрпинче (0,1 тонна) вара сăтăрçăсем те, органика хутăшĕсем те пулнă.
Кунсăр пуçне, ку йышши тавара хăрушсăрлăх тата пахалăх çирĕплетекен документсемсĕр (сертификат соответствия, декларация о соответствии, удостоверение о качестве крупы) сутнă. Маркировка та пулман сутуçăсен.
Тырă тата унран хатĕрленĕ продукцие тĕрĕс упрасси пĕлтерĕшлĕ, анчах та çакна пур çĕрте те астуса çитереймеççĕ.
Кăçалхи пĕрремĕш çур çулта тырă тата унран хатĕрленĕ продукцин хăрушсăрлăхĕ тата пахалăхĕ енĕпе 110 тĕрĕслевпе сăнав мероприятийĕ ирттернĕ, саккуна пăснă 107 тĕслĕх тупса палăртнă.
Ку енĕпе тĕрĕслевсем вĕçленмен-ха.
Пĕлтĕр 80 вĕрентÿ учрежденине тĕрĕсленĕ – 3,7 тонна кĕрпе тĕлĕшпе упрамалли тата усă курмалли условисене пăснине тупса палăртнă. Должноçри 80 çынна яваплăх пирки аса илтерме тивнĕ.
Н.ВАСИЛЬЕВА,
Россельхознадзорăн республикăри
управленийĕн ĕçченĕ.