31 октября 2015 г.
Кăçал Упнер çамрăкĕсем ял старости Г.В.Макарова пуçарнипе Аслă Çĕнтерĕвĕн 70 çулхи юбилейлă кунĕнче вăрçă паттăрĕсене асăнса 250 кăк чăрăш, 50 хурăн хунавĕ лартрĕç. Хăрнă йывăçсем вырăнне чĕртнĕ лаптăка «Аслă Çĕнтерĕве – 70 çул» лесопарк» статус пама йышăнчĕç.
Хамăр ял çамрăкĕ Антон Сергеев баннер та хатĕрлесе пачĕ, ял çыннисем ăна парк хĕррине вырнаçтарчĕç.
Шел, патриотизм туйăмне вăратакан ĕçе теприсем хаклама пĕлмерĕç. Путсĕрсем баннера çирĕплетнĕ тимĕрсене хăйпăтма шут тытнă, авнă, кукăртнă.
Паллах, паркра ĕçсем пур. Йăванса выртакан йывăçсене, çÿп-çапа илсе тухсан аван пулмалла. Вĕсем тавралăх илемне ытла та хытă пăсаççĕ. Çак ĕçе пурнăçлама ял администрацийĕ пулăшсан тем пекехчĕ. Мĕншĕн тесен ял халăхĕ кунта тата хунавсем лартса хăварасшăн.
В.ПЕТРОВ.