24 октября 2015 г.
Борис Леонтьева вулакансем хаçатра тухакан сăвăсем тăрăх çеç мар, выльăх-чĕрлĕхе пăхмалли усăллă канашсем пичетленипе те аван пĕлеççĕ. Çакă, чи малтанах, ветеринари врачĕ хăйĕн ĕçне чăнахах юратнине, асăрхаттару ĕçне тимлĕхе илнине, пушă вăхăтне усăллă ирттернине çирĕплетет.
Борис Николаевича, Кăмпал каччине, шăпа Санарпуç тăрăхне тĕлĕнмелле çавăрса килнĕ. Шкул хыççăн Вăрнарти зооветтехникумра пĕлÿ илнĕ. Пĕчĕкренех лашапа çÿреме, ĕçлеме хăнăхнăскере, вĕренÿ учрежденийĕнче те ут шанса панă. Нил тусĕпе вăл çăкăр, Вăрнарти сĕт заводне сĕт турттарнă.
Ĕçчен, хастар каччă техникумăн обществăлла пурнăçĕнчен те юлман. Районăн ятлă спортсмен-тренерĕсем – Валерий Миронов, Николай Старшов – патĕнче ăсталăха туптанă.
Турри пултарулăх енчен те кÿрентермен ăна. Техникум ушкăнĕпе чылай концерта хутшăннă. Асĕнче юлнă пĕр саманта вăл халĕ те йăл кулмасăр аса илеймест. Ветеринарсен ушкăнĕ практикăна вăл вăхăтри хăватлă «Звезда» колхозра ирттернĕ. Пĕр каçхине Уйкас Кипекри культура çуртне студентсен концертне курма лăк тулли халăх пуçтарăннă. Борис Леонтьевăн Муслим Магомаевăн юррине юрламалла. Çийĕнче – юлташĕн Михаил Георгиевăн костюмĕ. Сцена çине тухнă та – ун юрри тăсăлса мар, хăранипе сасси çĕтнипе касăкăн-касăкăн тухнă. Çынсем, ку шÿтлĕ номер тесе хырăмĕсене тытса кулнă...
Техникум пĕтерсен тантăшсем – Нургали Брчэ, Михаил Георгиев, Тимофей Анисимов, Валя Егорова, Зоя Михайлова, Рита Никифорова, Валера Михайлов, Зоя Владимирова – ĕмĕтри Инçетхĕвелтухăçне, Сахалина, тухса кайнă. Борис Николаевича Поронайск хулинчи «Заря» совхозри «Майское» уйрăмра 200 ĕне шанса панă. Таврара – хитре вырăнсем, илĕртÿллĕ тусем, çеçенхир, юханшывсем, ĕçле те, чун тăраниччен килен. Анчах та ку телей вăраха тăсăлман – виçĕ уйăхран çамрăка салтак атти тăхăнма вăхăт çитнĕ. Службăра ку енчех, Приморский çар чаçĕнче, тăнă.
Çар тумне хывсан техникумра вĕреннĕ Миша тусĕпе ял хуçалăх институтĕнче пилĕк çул пĕлĕве туптанă. Комсорг, ветеринари факультечĕн бюровĕн членĕ пулнă. Пĕр пÿлĕмре казах, узбек каччисемпе пĕр чашăкран апат çинĕ, туслăха çирĕплетнĕ.
Алла диплом илсен каллех романтика туйăмĕпе çунатланнă. Ярославль облаçĕнчи Некоузск районĕнчи «1 мая» совхозра тĕп ветеринари врачĕнче тăрăшнă. Кунти хĕрпе çемье çавăрнă. Виçĕ çултан пултаруллă çамрăка ку районти ветеринари станцин тĕп тухтăрне çирĕплетнĕ. Çулталăк çурăран Рыбинск районĕнчи чăх-чĕп фабрикине куçнă. Илĕртмĕшĕ те пулнă – пĕчĕк ачаллă çемьене тÿрех хваттерпе тивĕçтернĕ.
Аякри пурнăç аякриех çав. Шăллĕ, Валерий, çырупа тăван района таврăнма чĕнсе ярсан нумай шухăшламан. Санарпуçĕнче вырнаçнă «Вурнарский» совхозра ветеринари врачне сăмахсăрах йышăннă опытлă специалиста. Икĕ пÿлĕмлĕ хваттер те тÿрех панă. ,çĕ те интереслĕ, мăйракаллă шултра выльăх 3–4-шар пин. Çуллахи лагерьсем те, витесем те выльăхпа тулли. Кунне самăр вăкăрсене 100-шер пуç ăсатнă.
Вунултă çул тăрăшнă кунта выльăх-чĕрлĕх сывлăхĕшĕн. Мускав облаçĕнче квалификацие ÿстернĕ. Шел те, мăнаçлă хуçалăха сыхласа хăварайман, пуçлăх хыççăн пуçлăх улшăннă, специалистсене ĕçрен хăтарнă, витесем пушанса юлнă...
Борис Николаевич пĕр вăхăт конкурс управляющинче делопроизводительте ĕçлекелесе ларнă. Анчах та чун туртман ĕçре канлĕх туйман вăл. Çавăнпа та Кăмашри ветучастокăн Санарпуçпе Çĕньял Хапăс ялĕсенчи ветеринари врачĕ пулма сĕнсен пĕр сăмахсăр килĕшнĕ.
Вунвиççĕмĕш çул ĕнтĕ ку ялсенчи çынсен хуçалăхĕсенчи выльăх-чĕрлĕх сиплĕхĕшĕн тăрăшать, кайăк-кĕшĕк, килти чĕрчунсене, ĕне-выльăха прививкăсем вăхăтра тăвать, чиртен сыхланмалли тĕрлĕ канаш-сĕнÿсем парать.
Пĕлтĕр, ветеринарсен пĕрремĕш професси уявĕнче, Борис Николаевича Чăваш ен ветеринари службин Тавĕпе чысларĕç. Чăваш ен Пуçлăхĕн Указĕпе çирĕплетнĕ йĕркепе унăн «Чăваш Республикин ĕç ветеранĕ» ята илме стаж çитнĕ.
– Чи кирли – ĕçе юратни, выльăх чунне туйма пĕлни. Пирĕн профессире урăхла май çук, – тет Борис Николаевич.
Ахальтен мар ĕнтĕ. Сăввисенче те чунлăха мала хуни, чĕрчунсене хĕрхенни аван палăрать.
С.ЧИКМЯКОВА.