14 октября 2015 г.
Туçи Мăратри шкулта ачасене эстетикăлла воспитани парас тĕллевпе вунă тĕрлĕ секцисемпе кружоксем йĕркеленĕ. Ÿнере юратакан ачасем вĕсене хĕрĕхĕн çÿреççĕ. Уйрăмах вокал, ташă, сцена ăсталăхне алла илме, тăван тавралăх илемне ÿкерчĕксенче сăнарлама вĕрентекен кружоксене кăмăллаççĕ. Искусство ытамĕнчи ачасем хăйсен ăсталăхне пытарса усрасшăн мар, ыттисене кăтартса савăнтарасшăн.
Юрă-ташă кружокне çÿрекенсем ял ĕçченĕсене илемлĕ ташăсемпе, савăк юрăсемпе килентереççĕ. Концерт программинчи ташăсене Ираида Васильевна Малова, юрăсене Алевтина Николаевна Кузнецова илемлетнĕ.
Литература çулталăкĕнче тăван чĕлхене юратакансем Константин Васильевич Иванов çуралнăранпа 125 çул çитнине чыслăн паллă турĕç. Литература каçне чăваш чĕлхипе литературине вĕрентекен Людмила Васильевна Мироновăпа истори учителĕ Петр Яковлевич Золов ертсе пычĕç, ачасем «Нарспи» поэмăри сыпăксене вуларĕç. Литература çулталăкне халалланă стендри материалсене пысăк ăсталăхпа хатĕрленĕ.
В.МОСКВИН.