10 октября 2015 г.
Кĕр мăнтăрĕпе пĕрле ватăсен кунĕ те иртрĕ. Кĕçĕн Кипек ял тăрăхĕнче 8 ял, кашни ялах пĕр кунта çитме çуккине шута илсе уява икĕ кун паллă тума палăртнă. Пирĕн тăрăхра организаци таврашĕ çук, предпринимательсем те, фермер хуçалăхĕсем те ура çинче çирĕпех тăмаççĕ. Çавăнпа та Вăрнарти аш-какай комбинатĕнчен спонсорла пулăшу ыйтма тÿр килчĕ. Мĕн тетĕр? Николай Владимирович Аливанов хирĕçленине нихăçан та илтмен. Çавăн пек ырă чунлă пулнăшăн ăна эпир, мĕнпур ватă çынсем, чĕререн тав тăватпăр, ырлăх-сывлăх, вăрăм кун-çул, йывăр ĕçĕнче чăтăмлă пулма сĕнетпĕр.
Пăваялĕнчи культура çуртне хисеплĕ ватăсем пуçтарăнчĕç. Чи асли – Раиса Терентьевна Кудрявцева, 90 çулта пулсассăн та мăнукĕпе кучченеçпе çитрĕ. Аякри урамри ватăсене вара Александр Михайлов турттарса килчĕ. Район представителĕ Вячеслав Петрович Никифоров районта кĕрхи ĕçсем вĕçленнине пĕлтерчĕ, тыр-пул тухăçĕпе паллаштарчĕ, аш-какай комбиначĕн хушма хуçалăхĕнче кĕçех 1000 пуç вырнаçмалăх ĕне вити хута каяссине пĕлтерчĕ. Пире, ватăсене, ырă та вăрăм кун-çул, канлĕ ватлăх сунчĕ. Ял поселенийĕн пуçлăхĕ Сергей Волков та саламларĕ, ăшă сăмахсем каларĕ. Культура ĕçченĕсем хатĕрленĕ техĕмлĕ шÿрпепе, тутлă апат-çимĕçпе сайланнă хыççăн концерт куртăмăр. Тĕрлĕрен конкурссене хутшăнса ватăсем парнеллĕ пулчĕç: Роза Зайцева илемлетсе çыхнă тапăчкие, Раиса Кудрявцева тутăра тивĕçрĕç. Валентина Никонорова кашни çулах вĕри теркăпа сăйлать. Уяв чылая тăсăлчĕ. Киле хаваслă туйăмпа салантăмăр.
А.ПЕСКОВА.
Пăваяль.