07 октября 2015 г.
Чăваш ен Пуçлăхĕ Михаил Игнатьев Пĕтĕм тĕнчери «Сочи-2015» инвестици форумĕнче Правительствăн импорта улăштарас енĕпе ĕçлекен комиссийĕн Дмитрий Медведев премьер-министр ертсе пынипе иртнĕ ларăвне хутшăннă.
Чăваш ене илес-тĕк, импорта хамăрăн продукципе улăштармалли патшалăх политики республикăра ăнăçлă пурнăçланать. Тивĕçлĕ «çул-йĕр карттине» çирĕплетнĕ. Промышленноç предприятийĕсем чикĕ леш енчен кÿрекен чĕртавара, комплектламалли хатĕрсене Раççей аналогĕсемпе улăштараççĕ. Республика территорийĕнче ĕçлекен производствăсене анлăлатас, çĕннисене уçас тĕллевлĕ инвест-проектсем пурнăçланаççĕ.
Сочире Михаил Игнатьев Раççей ял хуçалăх министрĕпе Александр Ткачевпа кĕске вăхăтлăха тата инвестици шучĕпе илекен кредитсен процент виçин пĕр пайне патшалăх енчен субсидилемелли хушма кредитсем уйăрмалли майсене сÿтсе явнă.
Промышленноç тата суту-илÿ министрĕпе Денис Мантуровпа хускатнă тема – Чăваш енре импорта хамăрăн продукципе улăштарас ыйтусем. Ку вара – пĕчĕкрех тăкаксем, хушма ĕç вырăнĕсем тата тупăш. Сочире пулнă май, Михаил Игнатьев федерацин влаç органĕсен тата пысăк бизнес представителĕсемпе – РФ ĕçлев министрĕпе Максим Топилинпа, РФ вице-премьерĕпе Ольга Голодецпа, Раççей финанс министрĕпе Антон Силуановпа – ĕçлĕ тĕлпулусем ирттернĕ.
Кунта Пĕтĕм Раççейри регионсен социаллă аталанăвĕн программисен А.П.Починок ячĕллĕ премие çĕнсе илмелли конкурсне пĕтĕмлетнĕ. Ачасем тăлăха тата ашшĕ-амăшĕн ăшшисĕр юласран сыхланса пурнăçламалли профилактикăпа çыхăннă номинацире Шупашкарти çул çитменнисен социаллă реабилитаци центрĕн «Шанчăк сăпки» программине пурнăçланăшăн Чăваш ен Правительстви Диплома тивĕçнĕ.