16 сентября 2015 г.
Вырсарникун, Пĕрлехи сасăлав кунĕнче, Вăрнар районĕнче пурăнакансем те хăйсен ырлăхĕшĕн тăрăшассине чунтан шанса хăйсен шухăшне палăртрĕç. Чăваш Республикин Пуçлăхне суйланисĕр пуçне депутатсен район тата ял-хула поселенийĕсен Пухăвĕсен депутачĕсен çĕнĕ йышĕ йĕркеленчĕ.
Районти суйлав округĕсене иртенех çын йышлă пычĕ. Территорири суйлав комиссийĕн даннăйĕсем тăрăх, суйлава списока кĕртнĕ çынсен 76,4 проценчĕ хутшăннă. Поселенисем тăрăх илсен суйлава чи йышлă кайнисем Уйкас Кипек ял тăрăхĕнче пурăнакансем – 86,33 процент. Çавалкас тăрăхĕнче – 85,03, Кĕçĕн Кипекре – 83,80, Малти Ишекре – 81,40. Сахаллăнрах хутшăнакансем – Вăрнар хула, (54,50 %) тата Пăртас ял поселенийĕсенче (67,4 %). Ыттисенче – 70-80 процент.
Чăваш ен Пуçлăхĕн суйлавне илес пулсан, вăрнарсен пысăк пайĕ хăйĕн сассине Михаил Игнатьевшăн пачĕ: 12740 çын е сасăлавçăсен 71, 51 проценчĕ. Халăх ăнах ĕненсе сасăлани Михаил Васильевичăн республикăшăн тунă ырă, аталануллă ĕçĕсемпе çыхăнчĕ-тĕр. Эппин, халăх ăна çирĕп шанать.
Олег Николаев сасăлавçăсен – 15,05, Валентин Шурчанов – 8,3, Константин Субботин 2,13 процентне пухрĕç.
Депутатсен 6-мĕш сасăлаври Вăрнар район Пухăвĕн депутачĕсен йышĕ ытлашшиех улшăнмарĕ, унăн çĕнĕ корпусĕ çапларах: Елена Буданова, Евгений Захаров, Сергей Флегентов, Рифкат Киметов, Иван Сандомиров (Вăрнар), Владимир Леонтьев (Аçăмçырми), Владимир Тимофеев (Малти Ишек), Илья Арбузов (Упнер), Геннадий Спиридонов (Мăн Явăш), Виталий Николаев (Пăртас), Ольга Куликова (Ярмушка), Александр Петров (Ершепуç), Венера Николаева (Калинино), Валерий Шумилов (Кĕçĕн Кипек), Юрий Иванов (Уравăш), Вячеслав Ижелеев (Уйкас Кипек), Владимир Яковлев (Санарпуç), Сергей Анисимов (Шĕнер Ишек), Геннадий Романов (Çĕрпел).
Халăх суйлава малашлăхлă ĕмĕтсемпе хутшăнчĕ, хăйсен сассине пачĕ. Эппин, суйланнă кандидатсен те çынсен шанăçне тÿрре кăларасчĕ, ун тăнăçлăхĕшĕн-ырлăхĕшĕн чунтан тăрăшасчĕ.
С.ЧИКМЯКОВА.