16 сентября 2015 г.
Кăçалхи сакăр уйăхри кăтартусене тишкерсен шăпах çапла калама пулать. Патшалăх инспекторĕсем ку тапхăрта çул-йĕр правилисене пăснă 2034 тĕслĕхе шута илнĕ. Пĕлтĕрхи танлаштаруллă вăхăтра – 1624.
– Водительсем ытларах хăвăртлăх режимне пăснипе çакланнă. 325 тĕслĕхрен 30-шĕ – çуран çÿрекенсене çул паманни. Çавăн пекех 112 çын руль умне ÿсĕрле ларнă, 326 çын хăрушсăрлăх ременĕпе çыхăнман, – пĕлтерчĕ Раççей Шалти ĕçсен министерствин «Вурнарский» пайĕн пуçлăхĕн тивĕçĕсене вăхăтлăха пурнăçлакан Геннадий Казыкин.
Асăннă тапхăрта район территорийĕнче 25 авари пулнă. Вĕсенче тăватă çын вилнĕ, 39-ăн аманнă.
Çул-йĕр хуралçисем автомобиль çулĕсене, урамсене, чукун çул переезчĕсене те тĕрĕслесе тăраççĕ. Сакăр уйăхра 65 çула тата урама тĕрĕсленĕ хыççăн вĕсене тытса тăрас правилăсене пăснăшăн должноçри çынсем тĕлĕшпе 58, юридици сăпатĕнчи тăватă çын тĕлĕшпе 4 предписани тăратнă. Çулсене тата çул-йĕр сооруженийĕсене юсанă тата тытса тăнă вăхăтра çÿрев хăрушсăрлăхне тивĕçтерес йĕркене пăснăшăн должноçри 12 çын, юридици сăпатĕнчи 2 çын тĕлĕшпе административлă ĕç пуçарнă.
Районта ку тата çитес эрнере профилактика мероприятийĕсем иртеççĕ.
С.ЧИКМЯКОВА.