12 сентября 2015 г.
Ĕçлемесĕр, тар тăкмасăр укçаллă пулма питех те çăмăл мел тупнă вăтăр пĕррери Ильсун Шакиров. Кÿршĕллĕ Тутарстан Республикинчи Агрыз районĕнче çуралса ÿснĕскер, ку таранччен суд сакки çине темиçе те ларма ĕлкĕрнĕ. Юлашки хутĕнче çичĕ çул кирпĕч шутланă хыççăн вăл пĕлтĕрхи сентябрьте ирĕке тухнă. Тĕпленсе ĕçлеме шутламан. Мăшăрĕ Вăрнарта «Билайн» çыхăну салонĕнче тимленĕ май, И.Шакиров кунта тăтăшах пулкаланă, укçа-тенкĕ ăçта упраннине лайăх пĕлсе тăнă.
Кăçалхи январĕн 17-мĕшĕнче И.Шакиров килте хăнасемпе ирхи виçĕ сехетченех эрех-сăрапа айкашнă, самаях ÿсĕрĕлнĕ. Темшĕн ыйхă килмен. Кайран хăй каланă тăрăх, çуралса ÿснĕ ял, ашшĕ-амăшĕ аса килнĕ. Ир енне сăра туянма лавккана кайма шут тытнă. Мăшăрĕн курткин кĕсйинче 100 тенкĕ тупнă, кунтах çăра уççисем пуррине асăрханă. «Уçăсене мĕн тесе кăларса илтĕм-ши, хам та пĕлместĕп», – кайран ăнлантарнă И.Шакиров. «Мир» киоскра сăра туяннă хыççăн хайхискер «Билайн» çыхăну салонĕнчен укçа йăкăртма шут тытнă. Шала кĕриччен «Лидер» такси диспетчерĕ патне шăнкăравланă, Хусана çитме машина кирли çинчен пĕлтернĕ. Ăна «Пятерочка» лавкка умне ярса пама ыйтнă. Кăштах тăхтанă хыççăн, çичĕ сехет çурăра, çăрасемпе салона кĕмелли икĕ тимĕр алăка уçнă, пластик алăк хыççăн сигнализаци ĕçлесе кайнă. Васкаса пÿлĕме кĕнĕ, ещĕкре укçа тĕрки тупнă. Алăк çăрисен уççисене пăрахса хăварнă та урама чупса тухнă, больница еннелле утнă. Анчах кунта машина пулман пирки «Магнит» лавкка патнелле васканă. Палăртнă вырăна çитнĕ водитель кунта такси кĕтекен çын çукки çинчен диспетчера евитленĕ. Лешĕ таксиста арçынăн телефон номерне пĕлтернĕ.
Кĕçех И.Шакиров машинăна кĕрсе ларнă. Водителе тÿрех пиллĕк пин тенкĕлĕх пĕр укçа кăларса тыттарнă, хăйне Хусана çитерме ыйтнă.
Поселокри Советски урамри 39-мĕш çуртра вырнаçнă «Билайн» офисĕн хурал сигнализацийĕ ĕçлесе кайнă пирки ведомствăна пăхăнман хурал уйрăмĕнчен çийĕнчех Раççей Шалти ĕçсен министерствин «Вурнарский» муниципаллă уйрăмĕн дежурнăй пайне пĕлтернĕ. «Билайн» çыхăну салонĕн консультант-сутуçи çак киревсĕр ĕçе хăйĕн мăшăрĕ, Ильсун Шакиров, тума пултарнине пĕлтернĕ. Вырăнта çакă палăрнă: курупкара хăварнă 25.100 тенкĕ çухалнă.
Çĕрпÿ хули çумĕнчи Опытный поселок патне çитсен таксист патне Вăрнартан полици сотрудникĕ шăнкăравланă, чарăнса йĕрке хуралçисем çитиччен тăхтама ыйтнă. Ырă мара туйса илнĕ И.Шакиров кабинăран сиксе тухнă та тарнă. Виçĕ-тăватă минутран килсе çитнĕ çул-йĕрпе патруль службин сотрудникĕсене таксист хайхи пассажир хăш еннелле тарнине тата вăл мĕн тăхăннине пĕлтернĕ. Çав вăхăтра таркăн тепĕр машинăпа малалла вĕçтернĕ, водителе 2.500 тенкĕ тыттарнă. Анчах хуларан тухнă çĕрте йĕрке хуралçисем ăна çулса илнĕ.
И.Шакиров хăйĕн айăпне пĕтĕмпех йышăнчĕ. Район сучĕ ун тĕлĕшпе пуçарнă уголовлă ĕçе пăхса тухнă. Укçа вăррин 2 çул хушши çирĕп режимлă колонире кирпĕч шутлама тивет.
А.ШАШКАРОВ,
Раççей Шалти ĕçсен министерствин
«Вурнарский» пайĕн следстви уйрăмĕн
пуçлăхĕн заместителĕ юстици подполковникĕ.