09 сентября 2015 г.
Пăртасра пурăнакан Татьяна Давыдовна Иванован 90 çулхи юбилейлă кунĕ ырă самантран пуçланчĕ. Ветерана çывăх çыннисемпе пĕрле саламлама район администрацийĕн пуçлăхĕ Леонид Николаев, халăха социаллă хÿтлĕхпе тивĕçтерекен районти пай пуçлăхĕ Ирина Смолина, Пăртас ял тăрăхĕн пуçлăхĕ Геннадий Петров ирех çитрĕç, Кремльтен В.В.Путинран килнĕ салам çырăвне пачĕç.
Татьяна Давыдовна – Тăван çĕршывăн Аслă вăрçин участникĕ. Хăрушă тапхăр вунпиллĕкри хĕрачана та аслă çынсен ретне тăратнă. Сăр хĕррине окоп чавма илсе кайнă. Кĕçех каялла чĕнсе илсе колхозра кладовщик тивĕçне шаннă.
Вунçиччĕ тултарсан вăрçа кайма ят тухнă. Повесткăна 1943 çулхи çуркунне панă. Пĕр уйăх Санарпуç тата Уравăш уйĕсенче винтовкăран пеме, ал вĕççĕн çапăçма, стройпа утма, радистсен пуçламăш пĕлĕвне тата салтак пурнăçĕн саманчĕсене чăтма вĕрентнĕ. Июньте çара тухса кайнă.
Мурманскри хĕрарăмсен уйрăм ĕçлев батальонне лекнĕ. Тинĕс портĕнче Англирен тата Америкăран килекен карапсене пушатнă çĕрте ĕçленĕ.
1944 çулта тинĕс заливĕ урлă Карелие каçнă. Кунта çапăçусенче вилнĕ тата аманнă салтаксене пуçтарса паром çине тиенĕ.
Вăрçă çулĕ Варшавăна, Германие çитернĕ. Çĕнтерĕве нимĕçсен Вальденбург хулинче кĕтсе илнĕ.
Мухтавлă, паттăр хĕрарăмăн кăкăрне паян йышлă наградăсем илемлетеççĕ. Сăн-пичĕ, йăваш кулли вăл ырă çын иккенне çирĕплетет. Тăтăшах шÿтлекелесе илет. Ăс-тăнĕ çивĕч. Район хыпарĕсене аван пĕлет. Çавăнпах-тăр район администрацийĕн пуçлăхĕпе Леонид Николаевпа калаçнă май, ытти ялсенчи лару-тăрупа та кăсăкланчĕ вăл.
С.ЧИКМЯКОВА.