09 сентября 2015 г.
«Советская Чувашия» хаçат парнисемшĕн иртнĕ эстафетăра ку ял поселенийĕн команди кăçал та çĕнтерÿ Кубокĕллĕ пулчĕ
Андриян Николаев ячĕллĕ 77-мĕш эстафета чупăвне мĕнпур сферăри, тĕрлĕ ÿсĕмри çĕршер çын хутшăнчĕ. Çăмăл атлетсем хушшинче вăрнарсем та чылаййăн пулчĕç: вырăнти хăйтытăмлăх органĕсенче ĕçлекенсем, пресса представителĕсем, студентсем, шкул ачисем.
Пресса спорчĕн фестивальне хутшăнакансене саламланă май, Чăваш ен Пуçлăхĕн тивĕçĕсене вăхăтлăха пурнăçлакан Михаил Игнатьев республикăн патшалăх политики спорта аталантарас, нацие сыватас, халăха сывă пурнăç йĕркине анлăрах явăçтарас тĕллевлĕ пулнине, ку енĕпе тĕрлĕ программăсем ĕçленине, спорт объекчĕсем йышлă çĕкленине палăртрĕ.
Массăллă чупăвăн ырă енĕсене сумлă представительсем татах асăнчĕç. Çăмăл атлетика енĕпе Раççейĕн пĕрлештернĕ командин тĕп тренерĕ, Олимп чемпионĕ Юрий Борзаковский Чăваш енре чылай ăмăрту çав тери çÿллĕ шайра иртнине асăнчĕ.
Чăн та, нумаях пулмасть ку стадионта, «Олимпийскинче», çăмăл атлетика енĕпе Европăн команда чемпионачĕ иртнĕччĕ. Ют çĕршыв спортсменĕсем, хăнасем ун йĕркелĕвĕпе кăмăллă пулнине пĕлтернĕччĕ.
Трибунăсем чемпионат чухнехилле тулмарĕç пулин те ăмăртусен хĕрÿлĕхĕ савăнтарчĕ. Кашни тапхăр çивĕчлĕхпе уйрăлчĕ.
Шел те, кăçал спортсменсене темиçе забегра хутшăнма ирĕк памарĕç. Çавна май районсем хушшинче вăрнарсен командине пăрахăçларĕç. Ытти çулсенче ку ушкăнра кашнинче тенĕ пек малти вырăнсене тухаканччĕ.
Ял поселенийĕсем хушшинче вара Ершепуç тăрăхĕн команди кăçал та савăнтарчĕ. 400х5 эстафетăра Александр Политова, Галя Павлована, Сергей Политова (асли), Диана Политована тата Сергей Политова çитекен пулмарĕ.
Шупашкарта шăматкун кунĕпех çумăр вăйлă лÿшкерĕ пулин те спортсменсен кăмăлне хуçмарĕ. Хальхинче те вĕсем лартнă тĕллеве çанталăкăн кирек мĕнле условийĕнче те пурнăçлама май пуррине çирĕплетрĕç.
С.ЧИКМЯКОВА.