09 сентября 2015 г.
«Август» Фирмăна йĕркеленĕренпе 25 çул çитрĕ. 20 çул каялла ку компани Вăрнара килнĕренпе хутăш препаратсен завочĕн производстви ăнăçлă аталанать.
Мускавра иртнĕ юбилей уявĕнче, çав çулсене аса илнĕ май, компанин генеральнăй директорĕ Александр Усков çапла каларĕ: «Ку компание туса хунă чухне вăл ĕмĕрлĕх пултăр тесе ĕмĕтленнĕччĕ. Халĕ эпир тĕрĕс çулпа пыратпăр. «Август» – ÿсентăрансене хÿтĕлекен япаласем кăларакан ахаль компани çеç мар, пысăк чĕрĕ система, пирĕнтен кашниех унăн пĕчĕк клетки шутланать. Пире ачалла мар тĕрĕслесе пăхрĕç. Тĕрлĕрен лару-тăру пулчĕ. Вăрнар заводне ертсе пырас йышăну мĕн хака тăнине калас та килмест. «Августра» ун чухне 50 çынччĕ, пин çынлă пысăк парăмлă коллектившăн яваплăх илмеллеччĕ. Анчах эпир хăрамарăмăр. Халĕ шанатăп: вăрнарсем хăйсен пурнăçне «Августсăр» курмаççĕ».
Компани ăнăçăвĕ – кашни ĕçчен хăйĕн тивĕçне тÿрĕ чунпа пурнăçлани. Чаплă каçра Раççей Федерацийĕн Промышленность тата суту-илÿ министерствин Хисеп грамотине Вăрнарти филиалăн директорĕн заместительне Дмитрий Обухова пачĕç. Чăваш Республикинчи ял хуçалăх таварне туса илекенсемпе ĕçлекен Петр Пчеляков менеждер Раççей Ял хуçалăх министерствин Хисеп грамотине тивĕçрĕ.
Компанинче пĕтĕмпе 2141 çын ĕçлет, вĕсенчен 753-шĕ – Вăрнарти хутăш препаратсен заводĕнче. Юбилей умĕн ветерансене предприяти паракан уйăхри хушма пенси чухлĕ преми тÿленĕ.
Уяв икĕ куна тăсăлчĕ. Пĕрремĕш кунне делегацисем наци апат-çимĕçĕпе сăйларĕç, чăваш, беларуç, казах, украин чĕлхисемпе юрăсем шăранчĕç. Хăнасем пурте – наци тумĕсемпе, халăх ташшисем, вăййисем уява илемлетрĕç, туслăха, çĕре юратнине мухтарĕç.
Иккĕмĕш кун спорт мероприятийĕсенчен пуçланчĕ. Пирĕн футболистсем чаплă вылярĕç. Тĕп офис командине 7:3, «Август-Бел» командăна 2:1 шутпа çĕнтерчĕç. Стритбол енĕпе те ăмăрту пулчĕ.
Каç енне залра ку подразделенисен комадисем КВН-ра тупăшрĕç. Вăрнарсем те çивĕч шÿтсемпе палăрчĕç, иккĕмĕш вырăн йышăнчĕç. «Август» Фирма виçĕ командăна та хавхалантару вырăнне Алтай тăрăхне канма кайма путевкăсем пачĕ. Александр Усков сăмахĕсемпе, кунашкал илемлĕ вырăнсем тĕнчипе те урăх çук.
Л.ИВАНОВА.