09 сентября 2015 г.
Пĕр тăван Соколовсем, Светланăн çывăх çыннисем – пĕрле вĕреннисем, ĕçленисем Светлана Митрофановна (мăшăрĕн хушамачĕпе – Иванова) сывлăх сыхлавĕн хуралне тăнăранпа шăпах 35 çул çитнине паллă турĕç. Юбиляр Кĕçĕн Кипекре çуралса ÿснĕ, кунти вăтам шкулта вĕреннĕ.
Чăваш Республикин тава тивĕçлĕ учителĕ, 1969 çултанпа çак шкулта физикăна вĕрентнĕ, 1982-мĕшĕнчен нумай çул хушши ку шкул директорĕ пулнă Сергей Николаевич Андрианов Соколовсене пурне те пултарулăхне тĕрлĕ енчен палăртса ырăпа асилет. Юрий Митрофанович вăй-хал вăййисене хытă килĕштернĕ. Çар службине Одессăра ирттернĕ, 1-мĕш класлă специалист тата отличник пулнă, Чернобыль синкерне сирме хастар хутшăннă, инвалида юлсан та Питĕрте пуçаруллă ĕçĕ-хĕлĕпе тĕрлĕ наградăсене тивĕçнĕ. Венямин Митрофанович, шыв айĕн çÿрекен кимĕ морякĕ, главстаршина тата отличник-подводник, çичĕ çул хушшинче Лăпкă океан тăвăлĕсенче сывлăхне самаях хавшатнă, шел пулин те, пурнăçран вăхăтсăр уйрăлнă. Мария Митрофановна Çĕнĕ Шупашкарта ĕçлесе пурăнать. Августина Митрофановнăна Кипексен таврашĕнче вăл хăй вăхăтĕнче суту-илÿре пултаруллă пулнăран лайăх пĕлеççĕ. Светлана шкулта çуллен çулах класран класа чи паха паллăсемпе куçса пынă. Пушкăрт Республикинче патшалăхăн ВЛКСМ 15 çул тултарнă ятпа хисепленнĕ мединститутне вĕренсе пĕтернĕ. Виçĕ çуллăх интернатура хыççăн виçĕ çул врач-терапевтра, тăватă çул ытла терапи уйрăмĕн, çирĕм çул кардиологи уйрăмĕн пуçлăхĕнче тăрăшнă. Элĕкри тĕп больницăра тата ку районта чи хисеплĕ çынсенчен пĕри, чи аслă категори квалификацийĕпе ĕçлет. С.М.Иванова – Раççей Федерацийĕнчи сывлăха сыхлас ĕç отличникĕ. «Вăрнарсен Элĕкри посолĕ» Геннадий Иванович Иванов каланинчен: «Светлана Митрофановна патĕнче манăн темиçе хутчен те сывалма тиврĕ. Кардиологире профессиллĕ ăсталăхсăр пуçне шутсăр ырă чун-чĕреллĕ çын кирлине ăнлантăм. Ку врач çынна сывлăх парнеленипе пĕрле унра хăйĕн чĕре ăшшине хăварать...».
М.ВАСИЛЬЕВ.