09 сентября 2015 г.
Çăмăл атлетсем чупас çиçĕмлĕхе тĕрĕсленĕ вăхăтра вăй-хал спортсменĕсем Йĕпреçре кире пуканĕ çĕклессипе тупăшнă.
Чăваш Республикин Патшалăх Канашĕн председателĕн, Раççей спорт мастерĕн Юрий Поповăн парнисемшĕн иртнĕ турнира ку хутĕнче Мордовинчи, Мари Элти, Киров тата Ульяновск облаçĕсенчи гиревиксем хутшăннă. Çавăнпа та вĕсем хушшинче Вăрнар спортсменĕсем лайăх результатсем кăтартни уйрăмах пĕлтерĕшлĕ.
Вăрнарти 1-мĕш шкулти 11-мĕш класра вĕренекен Екатерина Лукина хĕрсем хушшинче 3-мĕш вырăн йышăннă. Ял хуçалăх техникумĕн студенчĕ Александр Николаев та çĕнтерÿ пьедесталĕн виççĕмĕш пусми çине хăпарма тивĕçнĕ.
Ăмăртусен регламенчĕ çирĕп – 5 минут çеç пулнă. Апла пулин те пирĕн ентешсем парăнман. Çакă вĕсем çуллахи вăхăтра та тренировкăсенче пиçĕхнипе çыхăннă. Катя та, Саша та Юрий Агиловпа, Анатолий Иванов опытлă тренерсем патĕнче ăсталăха туптаççĕ.
Шупашкарта ирĕклĕ майпа кĕрешессипе иртнĕ республикăн уçă турнирĕнче Чăваш енри, Тутарстанри тата Чĕмпĕр облаçĕнчи вăйлă спортсменсем тупăшнă.
Вăрнар çамрăкĕсем яланхиллех ырă ятра пулнă. Харпăр хăй виçе категорийĕнче Виталий Трофимов, Юрий Львов тата Юрий Степанов тренерсен вĕренекенĕсем тĕрлĕ виçеллĕ медальсене тивĕçнĕ. Чи маттурри – Дмитрий Львов, хăй ÿсĕмĕнче вăл чемпион пулса тăнă. Мăн Явăш хĕрачи Катя Кошкина, Вăрнарти Милена Федорова, Алексей Тимофеев, Никита Львов кĕмĕл медальсене тивĕçнĕ.
Настя Максимова тата Дмитрий Прокопьев виççĕмĕш вырăн йышăннă.
С.ЧИКМЯКОВА.