05 сентября 2015 г.
Аслă Çĕнтерĕвĕн 70 çулхи юбилейĕ умĕн Вăрнарти 2-мĕш вăтам шкул «Ачасене – Аслă Çĕнтерÿ çинчен» социаллă проекта хутшăннине пĕлтернĕччĕ.
Пирĕн районтан вăл – çарпа патриотизм тематикиллĕ ÿкерчĕксен галерейине тивĕçнĕ пĕртен-пĕр шкул. Унта паллă художниксен Тăван çĕршывăн Аслă вăрçин тапхăрĕсене çутатнă ĕçĕсем вырăн тупнă.
Картина галерейи шкулăн иккĕмĕш хутри фойинче вырнаçнă. Вĕренекенсем, педагогсем, хăнасем унпа кăмăлласа паллашрĕç. Февраль – май уйăхĕсенче кунта экскурсисем те чылай иртнĕ.
Чăн та, маларах курав залĕн стенисем паллă ÿкерчĕксен илемлĕхне пăсатчĕç. Халĕ ку ыйту татăлнă ĕнтĕ. «Август» Фирмăн «Вăрнарти хутăш препаратсен завочĕ» филиалĕ пулăшнипе фойене юсавра çĕнетнĕ, картинăсем те чаплăрах курăнаççĕ. Предприяти ырă ĕç валли 115 пин тенкĕ уйăрнă.