05 сентября 2015 г.
Чăваш писателĕсен пĕрлешĕвĕнче правлени ларăвĕ иртрĕ (Союз пуçлăхĕ Юхма Мишши – Михаил Николаевич Ильин, паллă çыравçă. 1964 çултанпа СССР Писательсен союзĕн членĕ, прозаик, поэт, драматург, куçаруçă, публицист, общество деятелĕ, нумай-нумай премисен лауреачĕ). Вениамин Сорокин сăвăçăн ыйтăвне пăхса тухнă çĕре СССР (РФ) Писательсен союзĕн членĕ, А.Талвир, А.Емельянов, И.Ивник премийĕсен лауреачĕ Владимир Кузьмин, чăваш писателĕсен пĕрлешĕвĕн членĕ, Эмине премийĕн лауреачĕ Елена Хĕвелпи (Барская-Блинова) активлă хутшăнчĕç.
Раççей Федерацийĕпе Чăваш Республикинчи çыравçăсен Канашĕн çынни, И.Ивник премийĕн лауреачĕ Улькка Эльмен ВенСор ячĕпе тăратнă сунăм-сĕнÿ хутĕнче çапла каланă: «Вениамин Иванович мана хăйĕн «Шуçăм сăввисем» кĕнекине парнелесен алăран ямасăр вуларăм. Йĕркесерен – чăн пурнăç. Куç умне пурнăçра нумай тÿснĕ-курнă çын тухать. Вăл çутçанталăка сăнама, çынсене тĕрĕс хаклама пĕлет. Юратăвĕ сÿнми тапса тăни кашни сăвăрах сисĕнет. Таврара пулса иртекен пулăмсемшĕн авторăн чĕри ыратни те, савăнни те пур. ВенСор тăван тавралăха, çемйине, тус-юлташĕсене хисеплени курăнать. Вениамин Ивановичăн вулакан чĕрине тыткăна илекен сăвăсем çырма пултарулăхĕ чăннипех те пурри пирки иккĕленмерĕм».
Писательсен йышне юлашки вунă çулта Вăрнар районĕнчен тепĕр çын хушăнчĕ. Вĕр-çĕнĕ билетлă автора ăнăçлă çул сунар.
М.ВАСИЛЬЕВ.