02 сентября 2015 г.
Мăньял Хапăсра та ял уявĕ савăнăçлă иртрĕ. Культура çурчĕ умĕнче ирех хитре юрă-кĕвĕ янăрарĕ. Сцена хатĕрленĕ, тĕрлĕ тĕслĕ шарсем çĕршер çакнă.
Мăньял Хапăс илемĕ яла пырса кĕнĕ чухнех курăнать, сылтăм енче часавай, сулахай енче – вăрçăра пуçĕсене хунă салтаксене чысласа вĕсен ячĕсене çырнă палăк. Инçех мар пысăк чул, ун çине Мăньял Хапăс мĕнле пуçланса кайни çинчен çырнă. Çавăн пек парнешĕн ялти пур çынсен ячĕпе Виктор Геннадьевич Мешкова тав тăвасшăн. Вăл кунта çуралса ÿснĕ, тăрăшуллă та ĕçчен çын.
Ял уявне нумай çын пухăнчĕ. Вĕсене Вăрманкас ял поселенийĕн пуçлăхĕ Владимир Павлов саламларĕ, ялти пурнăç мĕнле пыни çинчен каларĕ. Пушă çуртсем нумайланни, ялти çынсен шучĕ сахалланни ăна питĕ пăшăрхантарать.
Ял халăхне саламлама район администрацийĕн пуçлăхĕ Леонид Николаев килсе çитрĕ. Ялти çынсене тав сăмахĕ каларĕ, çамрăксене малалла хастар та çирĕппĕн утма сунчĕ.
Хăнасем хушшинче Вячеслав Степанов та пулчĕ. Хăй вăхăтĕнче юристра, судьяра ĕçленĕ. Вăл тăван ял çинчен хăйĕн сăввисене вуласа пачĕ. Ялти клуба бильярд сĕтелĕ парнелерĕ. Григорий Скворцов таврапĕлÿçĕ ял пуçланса кайни çинчен каласа кăтартрĕ.
Уяв питĕ интереслĕ пуçланчĕ. Аякран техника сасси илтĕнсе кайрĕ. Сцена умĕпе утă тиенĕ мотоблок иртет, умне лаша пуçĕ ÿкернĕ, «XXI ĕмĕрти ĕç лаши» тесе çырнă. Руль умĕнче чăваш çипуçĕ тăхăннă хĕрарăм. Ÿкерчĕксене 9-мĕш класра вĕренекен Наталья Миговарова тунă. Мотоблок хыçĕнче сенĕк, кĕрепле, çава йăтнă хĕрарăмсен ушкăнĕ «Хĕрсем утă çулма тухса каяççĕ» юрăпа çывхарчĕ. Вĕсен çи-пуçĕ аякранах халăха тыткăнларĕ. Тĕрлĕ тĕслĕ саппунĕсем халăхăн куçне илĕртрĕç. Ура çине тăрса, алă çупса чысларĕç вĕсене. Людмила Николаева та ял çинчен çырнă сăввине вуларĕ. Мăньял Хапăсри культура çурчĕ çумĕнчи, Вăрманкасри, Вăрнарти ветерансен хорĕпе ушкăнсем хăйсен хитре юррисемпе савăнтарчĕç.
Таврана тутлă шÿрпе шăрши сарăлчĕ. Людмила Степанова повар тата ăна пулăшаканĕсем Клава Васильева, Елена Иванова хăналарĕç. Спорт енĕпе те ăмăртусем пулчĕç. Волейболла вылярĕç, кире пуканĕ йăтрĕç.
Ял чăнахах та нумай улшăнчĕ. Пÿртсем умĕнчи пахчасенче хитре чечексем ÿстереççĕ. Çав конкурсрах 16 çын, «Хăтлă çурт» конкурсра – 2 çын палăрчĕç. Вăрăм ĕмĕрлĕ çынсене, анчах çуралнă виçĕ ачана, нумай çул пĕрле пурăнакан мăшăрсене парнесем пачĕç.
Чĕре савăнать хамăр ял туслă пулнишĕн. Уява йĕркелеме спонсорсем те чылаййăн пулăшрĕç. Ячĕсене çырса та пĕтереес çук. Пурне те пысăк тав. Халăх саланма та пĕлмерĕ – ташларĕ, юрларĕ, уяв салютпа вĕçленчĕ.
Çак уява ирттерме, хитрелетме пулăшнă, ларма-тăма пĕлмен ĕçчен çынсене чĕререн тав тăвас килет. Вĕсем культура çуртĕнче ĕçлекенсем: Наталья Галкина, Надежда Ефремова, Роза Кожанова тата Людмила Николаева. Вĕсем тăрăшнипех ялти клуба Шупашкарти нумай юрăçсем хăйсен пултарулăхне килсе кăтартрĕç. Спектакльсемпе килсе савăнтарчĕç.
Ял халăхĕ ыйтнипе вĕсене питĕ пысăк тав, малалла та пысăк çитĕнÿсем туса пыччăр.