29 августа 2015 г.
Çĕнĕ вĕренÿ çулĕ умĕнхи канашлу педагогсемшĕн усăллă, вĕрентÿллĕ, пĕлтерĕшлĕ пулнине çулсеренех палăртатăн. Унта хускатакан ыйтусем кашни учителех тивĕçлĕ пĕтĕмлетÿсем тума, ĕç планне тÿрлетÿсем хушма хистеççĕ.
Патриотсем ăçта?
Педагогсен августри канашлăвне хутшăннă май, Чăваш Республикин Патшалăх Канашĕн председателĕн Юрий Поповăн та, район администрацийĕн пуçлăхĕн Леонид Николаевăн та сăмахĕсенче çак ыйту çуралчĕ. Ăнсăртран мар.
Çамрăксем аслă пĕлÿ илнĕ хыççăн нумайăшĕ çуралнă вырăна таврăнмаççĕ çеç мар, специальноçпе те тăрăшмаççĕ. Патшалăх, ашшĕ-амăшĕ вĕсемшĕн сахал мар укçа тăкать пулин те. «Бюджет шучĕпе вĕренет пулсан, вĕсене çак укçана хăть палăртнă вăхăт чухлĕ ĕçлесе таттармалла тумалла» текен шухăш та ахальтен вĕçсе тухмасть ĕнтĕ.
– Ялсенче пулнă май, çынсем нумай çĕрте учительсем, врачсем çуккипе кăмăлсăрланаççĕ. Çав вăхăтрах хăйсен ачисем таçта аякра ĕçлесе пурăнаççĕ. Мĕншĕн вăл е ку тăрăхра ют çынсем килсе тăрăшмалла? – терĕ Юрий Алексеевич ачасенче патриотизм туйăмне вăратмаллине аса илтерсе.
Парламентари спикерĕ çитĕнекен ăрăва сывă пурнăç йĕркине анлăрах явăçтармаллине, ку енĕпе республикăра, Вăрнар районĕнче те, мĕнпур майсем пуррине уйрăммăн асăнчĕ.
Темăна тăсса район администрацийĕн пуçлăхĕ Леонид Николаев кăçал районти шкулсене тăватă çамрăк учитель кăна килни шухăшлаттарма тивĕççине палăртрĕ. Çавăн пекех вăл ачасене шкул автобусĕпе турттарас, уйрăм шкулсенче патшалăхăн пĕрлехи экзаменĕсене хатĕрленессине вăйлатас ыйтусене те хускатрĕ.
Çĕнĕлĕхсен тапхăрĕ
Çĕнĕ вĕренÿ çулĕнче вĕрентÿ тытăмĕнче каллех çĕнĕлĕхсем чылай пулĕç. Кăçалхи сентябрĕн 1-мĕшĕнчен 5-мĕш классем федераллă патшалăх çĕнĕ вĕрентÿ стандарчĕ çине куçĕç. 2016 çултанпа патшалăхăн пĕтĕмлетÿллĕ аттестацийĕнче обязательнăй экзаменсен списокĕ суйласа илнĕ хушма икĕ предметпа пысăкланĕ. Рособрнадзор ЕГЭ вăхăтĕнче видеоасăрхава онлайн режимра вăйлăлатать. Çавăн пекех экзаменсен материалĕсене вĕсене ирттерекен пунктра кăна пичетлĕç.
Пĕтĕмĕшле вĕрентÿ стандартне улшăнусем кĕртĕç: вырăс чĕлхипе литература хăй тĕллĕн предмет облаçĕ шутланĕ. Халăхсен чĕлхипе кăларнă учебниксене Раççейĕн федераллă переченьне кĕртессипе мерăсем йышăнĕç.
2016 çулхи сентябрьтен çавăн пекех хевтесĕр ачасем валли федераллă патшалăх вĕрентÿ стандарчĕ вăя кĕрĕ. 2015 – 2016 вĕренÿ çулĕнче патриотла воспитанин патшалăхăн çĕнĕ программи старт илет.
Пĕлтерĕшлĕ çĕнĕлĕхсенчен пĕри вăл – ку вĕренÿ çулĕнче технологи предметне пысăк тимлĕх уйăрни. Вăл Технологи предмечĕн çулталăкĕ ятпа иртĕ. «Шкул ертÿçисен професси ăсталăхĕн шайне çĕклессипе практика мелĕсене хатĕрлемелле», – сĕнчĕ район администрацийĕн вĕрентÿпе çамрăксен политикин пайĕн пуçлăхĕ Маргарита Тихонова.
Пĕлÿ кăтартăвĕ
11-мĕш тата 9-мĕш классенчен вĕренсе тухакансем пĕтĕмĕшле патшалăх экзаменĕсене йĕркеллĕ тытнă. Вăл е ку предметпа вăтам результатсем республикăринчен пысăкрах. Вырăс чĕлхипе 69,3 балл. Уйрăмах Кÿстÿмĕрти, Вăрнарти 1-мĕшпе 2-мĕш, Санарпуçĕнчи шкулсенчен тухакансем ку предмета чаплă пĕлнине çирĕплетнĕ. Пĕчĕк результатсем – Мăн Явăшри, Хапăсри, Кульцаври шкулсенче вĕренекенсен.
Математикăна профильлĕ шайра 11-мĕш класран тухнă 108 ачаран 91,6 проценчĕ пурнăçланă. Чи лайăх кăтарту каллех Кÿстÿмĕрти, Санарпуçĕнчи тата Вăрнарти 1-мĕш шкулсенче вĕренекенсен. Кульцав, Малти Ишек, Мăн Явăш, Çĕрпел тата ытти хăшпĕр шкулăн ку енĕпе ĕçлемелĕх пур.
Ку предмета база шайĕнче 90 выпускникран 95,5 проценчĕ ăнăçлă тытнă.
9-мĕш класран тухакансем хушшинче тĕрĕс наукăпа 12 шкулти 18 вĕренекен пĕрремĕш тапхăрта «виççĕлĕх» те балл пухайман.
Маргарита Николаевна экзаменсен кăтартăвĕсене пĕлÿ парас процесра шута хумаллине асăрхаттарчĕ. Çакă, паллах, профильлĕ вĕренÿ çине те пысăк витĕм кÿрет. «Патшалăх политикин приоритечĕсем улшăнчĕç, вăл е ку шкулăн ăнăçăвне аслă шкула вĕренме кĕнĕ выпускниксен шучĕпе хаклама пăрахрăмăр. Пирĕн вăтам професси вĕренĕвĕ престижлă мар текен мифа сирме тăрăшмалла. Вăтам звенора профориентаци ĕçĕн эффективлăхне ÿстермелле, – терĕ вăл. – 10–11-мĕш классем социаллă хÿтлĕх институчĕсем мар, профильлĕ классем пулнине ăнланмалла. Вĕсен аслă пĕлÿ илес тĕллевлĕ çамрăксене хатĕрлес задачăсене лартмалла. Çавăнпа та педагогика коллективĕсем 10-мĕш классене кирек мĕнле те пулин тултарма тăрăшни тĕрĕс мар».
Пĕрлехи ĕç
Вĕрентÿпе çамрăксен политикин пайĕн пуçлăхĕ ытти чылай ыйту çинче те чарăнса тăчĕ. Ырă сăмаха районти, республикăри предмет олимпиадисен çĕнтерÿçисене хатĕрлекенсем тивĕçрĕç: Маргарита Буславская, Римма Павлова (1-мĕш шкул), Елена Горбунова (2-мĕш шкул), Татьяна Петрова (Пăртас), Альбина Павлова (Мăн Явăш), Алиса Яшнова (Калинино), Наталья Васильева (Кÿстÿмĕр).
Вăрнарти 1-мĕш шкулти Наталия Самарина «Самый классный классный» конкурсăн республикăри çĕнтерÿçи пулса тăнă. 2-мĕш шкулти Ольга Физер тата «Рябинка» ача сачĕн воспитателĕ Наталия Савина – «Çулталăкри чи лайăх учитель – 2015», «Çулталăкри чи лайăх воспитатель» конкурссен лауреачĕсем.
Поселокри «Березка» ача сачĕн аслă воспитателĕ Наталия Макарова тата ача-пăча ÿнер шкулĕн педагогĕ Елена Есенцева Чăваш Республикин Пуçлăхĕн грантне тивĕçнĕ. Сертификатсемпе канашлура вĕсене Чăваш Республикин Паташлăх Канашĕн председателĕ Юрий Попов чысларĕ.
Чыса тивĕçлисем
Августри канашлура сцена çине чыслава тухакан педагогсем яланах йышлă. Кăçал та ĕçре палăрнисене, çĕнĕ вĕренÿ çулне пÿлĕмсене кăтартуллă хатĕрленисене, тĕрлĕ енлĕ пĕтĕмлетÿре ырă тĕслĕх кăтартакансене грамотăсемпе чысларĕç.
Калининăри шкул директорĕн воспитани енĕпе ĕçлекен çумĕ Галина Лукина, Аçăмçырми шкулĕнчи физкультура учителĕ Владимир Петров Чăваш Республикин Патшалăх Канашĕн, Вăрнарти 1-мĕш шкулти Румия Басырова, Мăн Явăш шкулĕнчи Елена Макарова, Хапăс шкулĕнчи Валентина Миговарова, Вăрнарти 2-мĕш шкулти Людмила Николаева, Калинино шкулĕнчи Надежда Тикинева, «Рябинка» ача сачĕн воспитателĕ Наталия Савина, вĕрентÿпе çамрăксен политикин пайĕн тĕп экономисчĕ Инна Краснова Чăваш Республикин Вĕрентÿпе çамрăксен политикин министерствин Хисеп грамотисене тивĕрĕç. Профильлĕ министерствăн Тавĕпе Ярмушка шкулĕнчи аслă вожатăя Любовь Максимована чысларĕç.
Район администрацийĕн Хисеп грамотисене илнисем пиллĕкĕн: Наталья Петрова (Вăрманкас шкулĕ), Людмила Васильева (Кĕçĕн Кипек), Елена Петрова (Мăн Явăш), Анжелика Вазанова (Калининăри шкул-интернат) тата Валентина Лустухина (Малти Ишек).
С.ЧИКМЯКОВА.