29 августа 2015 г.
Паллă, тĕрлĕ сферăра ăнăçлă ĕçлекен çынсемпе мухтавлă, районти чи пысăк Пăртас ялĕ те уявра кĕрлерĕ
Мĕн тери пултаруллă çынсем пурăнаççĕ иккен кунта. Чăваш ене 50 çул урамри стадионта ял уявĕ тĕлне йĕркеленĕ куравра пăртассен алăстисен ĕçĕсемпе паллашма май пулчĕ. Тĕрлĕ мелпе çыхнă, тĕрленĕ, ăсталанă япаласем чăнахах тыткăнлаççĕ. Поселени пурнăçне çутатакан фотостенд умĕнчен те халăх татăлма пĕлмерĕ.
Кулинари ăстисем хăйсен çимĕçне тутанма сĕнчĕç. Шÿрпе-шашлăк шăрши сăмсана кăтăкларĕ. Ачасене хăйсене уяв кĕтрĕ – вĕсем батут çинче сиксе киленчĕç.
«Ырă сунса кĕтетпĕр!» текен транспарант çинчи сăмахсем чăнахах та кашни çĕртех палăрчĕç. Çыннисем кăмăллă, тарават. Пĕр-пĕрне хисеплени курăнать.
Историе илес пулсан Пăртас ялĕсем республикăра виççĕ. Пирĕн районтисĕр пуçне Елчĕк тата Вăрмар тăрăхĕсенче. Пирĕн пата вăл Вăрмар районĕнчен куçса килнĕ. Архив докуменчĕсенче ăна пуçласа 1719 çулта асăннă. Пăртассем кăçал тăван ялĕн 296 çулне паллă турĕç.
– Ял уявĕ пĕр-пĕринпе тĕл пулса калаçма, туслăха çирĕплетме, пĕрле савăнма май парать, ентешсене пĕтĕçтерет, – терĕ район администрацийĕн пуçлăхĕ Леонид Николаев пăртассене саламланă май.
Пăртассен ĕçченлĕхне, хастарлăхне Пăртас ял поселенийĕн пуçлăхĕ Геннадий Петров та, депутатсен районти Пухăвĕн депутачĕ Виталий Николаев та, район администрацийĕн пуçлăхĕн заместителĕ Николай Петров та палăртрĕç.
Чăн та, пухăннисем хушшинче тĕрлĕ ĕçре палăрнă çынсем сахал мар пулчĕç. Алексей Белов акă ĕмĕрĕпе вĕрентÿ ĕçĕнче вăй хунă. Хăйне сăмах панă май, вăл ентешĕсене тăван яла, ун çыннисене юратма ыйтрĕ.
Ятарласа ăсталанă сцена çине тĕрлĕ шайри наградăна илме чылай çынна чĕнчĕç. Пăртасри Зоя Гордеевапа Волонтерти Любовь Исакова «Чăваш Республикин ĕç ветеранĕ» удостоверенисене илчĕç. Вячеслав Кузьмин, Виталий Николаев депутатсем, Людмила Никитина медсестра район администрацийĕн Хисеп грамотисене тивĕçрĕç. Мария Кораблева, Елена Краснова, Виталий Николаев, Вячеслав Кузьмин, Андрей Галкин, Александр Грибов, Михаил Васильев, Олег Лукин, Александр Егоров, Николай Журавлев, Юрий Филимонов, Светлана Лукина, Людмила Никитина, Любовь Семенова, Людмила Иванова – Пăртас ял поселенийĕн грамотисене.
– Хисепе тивĕç çынсем ялта татах нумай, вĕсене те вăхăчĕпе чыслăпăр, – палăртрĕ поселени пуçлăхĕ Геннадий Петров.
Ял уявĕ тĕлне тĕрлĕ конкурссем те йĕркеленĕ: «Чи лайăх хушма хуçалăх», «Чи хитре чечек пахчи», «Алĕç ăсти», «Чи тутлă апат-çимĕç пĕçерекен». Вĕсем тата алла-аллăн тытăнса 50 çул ытла утакан мăшăрсем, ялти чи аслă çынсем, тин кăна чăмăртаннă çамрăк мăшăр, кăçал çуралнă ачасем дипломсене, парнесене тивĕçрĕç.
Сцена çинчен районти культура çурчĕн, вырăнти артистсен тăрăшулăхĕпе янăранă юрă-кĕвĕ çеммипе юнашарти футбол уйĕнче Виталий Николаев парнисемшĕн турнир пычĕ. Пăртассем хăйсем икĕ команда тăратнă. Çавăн пекех унта «Гвардеец», «Химик», Шĕнер Ишек, Мăн Явăш ялĕсен командисем хутшăнчĕç. Комсомольски районĕнчи Шурут ялĕнчен те килсе çитнĕ футболистсем. Хĕрÿ вăйăра пăртассем ята ямарĕç – çĕнтерÿ те вĕсен аллинче пулчĕ, виççĕмĕш вырăн та.
Футбол выляманнисем тĕрлĕ конкурссенче вăй виçрĕç.
Çуралнă тăрăха килнĕ май, пăртассен уявне паллă ентешĕмĕр РАЕ академикĕ, Санкт-Петербургри университетсен профессорĕ Сергей Владимиров та çитсе курчĕ, ялсем хăйсен халăхĕн йăлине манманнине ырласа палăртрĕ. «Пăртас ялĕ аталанса пыни кермен пек çуртсенчен аван курăнать. Уяв кунта хастар, туслă, ĕçчен çынсем пурăннине çирĕплетет», – терĕ вăл.
С.ЧИКМЯКОВА.
Л.АЛЕКСЕЕВА.