29 июля 2015 г.
Раççейре халăха ĕç вырăнĕсем, ĕçпе тивĕçтерекенсене сотрудниксем тупма пулăшакан «Работа в России» рекрутинг порталĕ ĕçлеме тытăннă. Унăн мĕнпур сервисĕ тÿлевсĕр.
Сайтра вакансисене ĕçпе тивĕçтерекен центрсенчен çеç мар, тÿрремĕн предприяти-учрежденисенчен, çавăн пекех ĕç шыракансемпе сĕнекен порталсенчен те пуçтарнă. Унта харпăр хăй резюмине е вакансине вырнаçтарас тесен регистраци витĕр тухмалла. Патшалăх тивĕçтерĕвĕсен пĕрлехи порталĕ урлă та кĕме пулать.
Ĕç шыракан рассылкăна кирек хăш регионти ваканси çинчен те илме пултарать. Аякри ĕç вырăнĕ пирки ертÿçĕпе скайппа калаçса илме май пур.
Ертÿçĕсем хăйсен вакансийĕсене вырнаçтарнисĕр пуçне персонала кунта çăмăллăнах тупма пултараççĕ.
Ку информацисĕр пуçне порталта информаци пайĕ те пур, унта вăл е ку регионăн илĕртÿлĕхĕпе, çурт-йĕр ыйтăвĕ майлă пулни, шалу, хаксен шайĕ пирки те пĕлме пулать.
Порталпа «Газпром» АУО, «Ростех» патшалăх корпорацийĕ, «Раççей Почти» ФПУП, «Раççей чукун çулĕсем» АУО килĕшÿсем çырнă та ĕнтĕ.
Кунта çавăн пекех интерактивлă карта та пур. Ăна шырав системисемпе çыхăнтарнă. «Работа в России» сайтăн пĕтĕм инфраструктури патшалăх тивĕçтерĕвĕсен порталĕпе çыхăннă.