25 июля 2015 г.
Çулталăкăн çуррине каçнă май, малтанхи пĕтĕмлетÿсем тума вăхăт. Районти выльăх-чĕрлĕх комплексĕнче ĕçлекенсем ăна ÿсĕмлĕ вĕçлерĕç. Районта сĕт туса илесси те, выльăхсен шучĕ те ÿснĕ.
Чăваш патшалăх статистика службин сведенийĕсем тăрăх, Вăрнар районĕ сĕт туса илессипе тата сутассипе Елчĕк тата Шупашкар районĕсем хыççăн виççĕмĕш вырăн йышăннă.
Ултă уйăхра мĕнпур категорири хуçалăхра сĕт производстви 19247 тоннăпа танлашнă, вăл шутран 6365 тонни – ял хуçалăх предприятийĕсенче. 15,5 процентлă ÿсĕме Вăрнарти аш-какай комбиначĕ, «Мураты», «Янгорчино», К.Маркс ячĕллĕ, С.Лукина, А.Иванова тата А.Фадеев фермерсен хуçалăхĕсем уйрăмах пысăк тÿпе хывнă. «Юнтапа» тата «Хорнзор» хуçалăхсенче лару-тăру япăхрах.
Вăрнарсем çур çул кăтартăвĕсемпе аш-какай туса илессипе те виççĕмĕш вырăнта. Мĕнпур хуçалăхра çак тапхăрти производство 3002 тоннăпа танлашать, ял хуçалăх предприятийĕсенче 1435 тонна. Ку енĕпе хальхинче «Кольцовка», «Победа», «Хорнзор» хуçалăхсем аван ĕçленĕ.
Мăйракаллă шултра выльăх тата сыснасен шучĕпе те Вăрнар районĕ чи лайăх ĕçлекен виçĕ район хушшинче. Июлĕн 1-мĕшĕ тĕлне ĕне-выльăх 17527 пуç шутланнă, сыснасем – 17862 пуç. Выльăх кĕтĕвне «Кольцовка», К.Маркс ячĕллĕ, «Янгорчино» тата «Мураты» хуçалăхсенче ÿстернĕ. Çав вăхăтрах «Знамя», «Броневик», «Юнтапа» тата «Победа» хуçалăхсенче палăрмаллах чакнă.
– Илекен пăрусене упраса хăварасси, çакăн валли мĕнпур услови туса парасси, вĕсене пахалăхлă апатпа тивĕçтересси, пăхасси, ăратлăха лайăхлатасси кашни ертÿçĕн, зооветспециалистăн, выльăх-чĕрлĕх ерчетекенсен кулленхи тимлĕхĕнче пулмалла. Çуллахи тапхăрта пахалăхлă апат çителĕклĕ хатĕрлессипе, витесене юсасси-çĕнетессипе çине тăрса ĕçлемелле, – терĕ районти тĕп зоотехник Георгий Павлович Романов.
С.ЧИКМЯКОВА.