18 июля 2015 г.
Августăн 20-мĕшĕччен районта «Çула çитмен çамрăк» оперативлă профилактика мероприятийĕ пырать.
Çавна май йĕрке хуралĕн ĕçченĕсем профилактика субъекчĕсемпе пĕрле çула çитмен çамрăксемпе ĕçлекен комиссире учетра тăракан ачасене, ачисем çине япăх витĕм кÿрекен ашшĕ-амăшне тĕрĕслеççĕ. Çавăн пекех вĕсем кĕçĕннисем пурнăçăн йывăр условийĕсене тата социаллă хăрушă лару-тăрăва лекессинчен асăрхаттарас тĕллевпе ăнăçсăр çемьесенче те пулĕç.
Çамрăксем нумай пулакан вырăнсенче кăнтăрла та, каçсерен те рейдсем иртеççĕ. Вĕсен тĕллевĕ – çула çитмен çамрăксене йĕркене хирĕçле ĕçсем тума хĕтĕртекен çынсене, çамрăксем спирт шĕвекĕсем ĕçнине, вĕсем килсĕр, асăрхавсăр çапкаланса çÿренине тупса палăртасси тата ачасем хутшăннипе пулакан преступленисене асăрхаттарасси. Асăрхав объекчĕсен шутĕнче – кану центрĕсем, культура çурчĕсем, дискотекăсем, барсем, кафесем, лавккасем.
Оперативлă профилактика операцийĕ вăхăтĕнче тăватă административлă протокол çырнă: ачисене пăхас, воспитани парас, вĕрентес, прависене тата интересĕсене хÿтĕлес ĕçсене тивĕçлĕ пурнăçламаншăн ашшĕ-амăшĕ е саккунлă представителĕсем тĕлĕшпе икĕ протокол, çула çитмен çамрăка алкоголь ĕçтернĕшĕн пĕр протокол, обществăлла вырăнта ÿсĕрле çÿренĕшĕн пĕр протокол.
Административлă материалсене пурне те район администрацийĕ çумĕнчи çула çитмен çамрăксемпе ĕçлекен комиссие ярса панă.
Э.ТАТАРОВА,
çула çитмен çамрăксемпе ĕçлекен аслă инспектор полици майорĕ.