15 июля 2015 г.
Чăвашсен икĕ изданийĕ Пĕтĕм Раççейри «Çулталăкри чи лайăх кĕнекесем» XXIV конкурс çĕнтерÿçисем пулса тăнă.
«Михаил Сеспель – цветок земли и неба» кĕнеке М.Горький ячĕллĕ Литература институчĕн ятарлă дипломне тивĕçнĕ. «Энциклопедия чувашской журналистики и печати» кĕнекене вара конкурса йĕркелекенсен шучĕпе отрасльти чи лайăх издани тесе палăртнă. Çак ĕç Раççей Журналистсен союзĕн дипломне те тивĕçнĕ. Вăл Пĕтĕм тĕнчери «Вся Россия – 2015» пресса фестивалĕн «Ылтăн çÿлĕкĕ» çине лекнĕ. Эксперт канашĕ çĕнтерÿçĕсене 50 регионти тата çывăхри пилĕк ют çĕршыври 650 кĕнеке шутĕнчен уйăрнă.
Мускаври Хĕрлĕ площадьре иртнĕ фестивале Чăваш кĕнеке издательстви 150 кĕнеке илсе кайнă. Хăнасем уйрăмах «Из опыта народных мастеров» кĕнеке серийĕпе кăсăкланнă. Константин Ивановăн парне валли кăларнă «Нарспи» изданине кăмăлласа туяннă. «Чувашская Республика. Приглашение к сотрудничеству» презентаци фотоальбомĕ те аван саланнă. Ачасен кĕнекисем пирки чылай ăшă сăмах каланă.