11 июля 2015 г.
Июнĕн 17-мĕшĕ тĕлне республикăра чĕрчун урнă 56 тĕслĕхе шута илнĕ. Тилĕпе – 44, йытăпа – 7, кушакпа – 4, пăсарапа 1 çыхăннă.
Вăрманти-уйрисем çак хăрушă чире кăçал пĕлтĕрхинчен ытларах ертеççĕ. Етĕрне (13), Çĕмĕрлепе Пăрачкав (6-шар), Куславкка, Муркаш тата Шупашкар (4-шар), Элĕк, Канаш, Улатăр (2-шер), Вăрнар (1), Çĕрпÿ, Йĕпреç, Хĕрлĕ Чутай районĕсенче тата Шупашкарта (3-шер) тупса палăртнă. Чĕрчун урнă тĕслĕх январь–май уйăхĕсенче пĕлтĕрхи çав вăхăтринчен 11 ытларах хушăннă.
Республика Пуçлăхĕн хушăвĕпе килĕшÿллĕн амак вырăнĕсене карантина хупаççĕ, ветеринари служби чир инфекцине пĕтерессишĕн вăй хурать. Урнă тĕслĕхĕн 78 % – тилĕрен. «Инфекци вĕсем ĕрчекен çĕрте упранать. Ăна пĕтерейместĕн, – пĕлтерет ЧР патшалăх ветеринари службин ертÿçи Сергей Скворцов. – Вăл тилĕсене, ытти чĕрчуна еретех. Выльăх-чĕрлĕхе инфекцие тамалтармалли эмелпе вакцинăлани – чирпе кĕрешмелли ăнăçлă меслет».
ЧР Сунарçăсемпе пулăçсен патшалăх служби тилĕсен йышне пĕчĕклетес тĕллевпе çулталăк пуçламăшĕнче ятарласа хушу кăларнă. Унпа килĕшÿллĕн кăçалхи 5 уйăхра ăна 500 ытла тытнă, тирне сÿмесĕрех тушкисене Çĕрпÿ районĕнчи санитари-утиль заводне леçнĕ. Хĕрлемессен шутне йĕркелемелли тапхăра сентябрь уйăхĕччен тăснă. ЧР Министрсен Кабинечĕ кăçалхи пĕрремĕш кварталта инфекципе кĕрешмелли вакцина туянмашкăн республика хыснинчен 1121 пин тенкĕ уйăрма йышăннă.
Кăçалхи январь – май уйăхĕсенче коммуналлă хуçалăхсем килсĕр-хваттерсĕр 1300 йытăпа 600 кушака тытса малтан ветстанцисене, кайран Çĕрпÿ районĕнчи санитари-утиль заводне ăсатнă. «Вĕсем урлă та чир сарăлма пултарнă», – терĕ Сергей Иванович.
Иртнĕ уйăхра Сĕнтĕрвăрри районĕнчи Çатракасси ялĕнче кушак аçи темиçе çынна ураран çыртнă тата чĕрмеленĕ. Республикăн ветеринари лабораторийĕ вăл урнине çирĕплетнĕ.
Июль уйăхĕн 2-мĕшĕнче Пăрачкав районĕнчи Кудеиха ялĕ çывăхĕнчи Кире шывĕ хĕрринче 14 çулти хĕрачана тилĕ тапăннă. Аллинчен çыртса пĕтернĕ. Хĕрача ăна ан тартăр тесе ура айĕнчи сĕрекепе çавăрса вырттарнă.
Çав каçах хĕрачана медицинăн васкавлă автомашинипе Пăрачкав больницине илсе пынă, çийĕнчех уртаракан чиртен сиплев курсĕ пуçланă. Лабораторире тилĕ урнине çирĕплетнĕ.
Июнь уйăхĕнче ЧР Сунарçăсемпе пулăçсен патшалăх службин тата ветстанци специалисчĕсем Министрсен Кабинечĕ уйăрнă укçапа туяннă вакцинăсене тилĕ йăвисене кĕмелли шăтăксен умне хурса тухнă.