04 июля 2015 г.
Шупашкарта нумаях пулмасть çав тери сумлă ăмăрту – çăмăл атлетика енĕпе Европа чемпионачĕ – иртрĕ. Чăваш ен Пуçлăхĕн тивĕçĕсене вăхăтлăх пурнăçлакан Михаил Игнатьев ячĕпе Европăри çăмăл атлетика ассоциацийĕн медицина тата допинг тĕрĕслевĕ енĕпе ĕçлекен делегатĕнчен Елена Городиловаран тав çырăвĕ килнĕ. Акă мĕн çырнă унта:
– Хисеплĕ Михаил Васильевич Игнатьев!
Çăмăл атлетика енĕпе Европăн VI команда чемпионачĕ Раççей çĕнтернипе вĕçленчĕ. Манăн ăмăртусене çав тери çÿллĕ шайра йĕркеленĕшĕн тав тăвас килет. Çакна Европăри çăмăл атлетика ассоциацийĕн мĕнпур представителĕ палăртрĕ. Чемпионата уçнă чухнехи пуян концерт пĕтĕм халăхăн, уйрăмах ют çĕршывран килнисен, чунне хускатрĕ. Мана çар оркестрĕ тата Аслă Çĕнтерĕве халалланă юрăсем тыткăнларĕç. Наци юрри-ташши тĕлĕнтерчĕ.
Йĕркелÿ саманчĕсенче кăлтăк пулмарĕ. Волонтерсем акăлчанла аван пуплерĕç. Кашни саманта шута хуни савăнтарчĕ.
Медицина персоналне пысăк ăсталăхшăн, пулăшушăн, тим-лĕхшĕн пысăк тав. Çавăн пекех – транспорт пайĕн ĕçченĕсене те.
Чăваш халăхĕн тараватлăхĕшĕн, мĕнпур йĕркелÿçĕ, тивĕçтерÿ персоналĕ умĕнче пуçăма таятăп. Сире Европа чемпионатне чаплă хатĕрленсе ирттернĕшĕн, спорта тата пултарулăха аталантарнăшăн чĕререн тав тăватăп, çакă ăрусене çыхăнтаракан, çитĕнекен ăрăва сывă пурнăç йĕркине, илеме туйма хăнăхтаракан чи лайăх мел.