01 июля 2015 г.
Республика кунĕ умĕн «Агро-100» Клуба кĕнĕ республикăри чи лайăх ял хуçалăх предприятийĕсен ячĕсене пĕлтернĕ. Пирĕн районтан унта тăхăр хуçалăх кĕнĕ
Вăрнарти аш-какай комбиначĕ (ертÿçи Николай Аливанов) маларахри çулхипе танлаштарсан пĕр йĕрке хăпарнă – иккĕмĕш вырăнта. Ăнсăртран мар. Предприяти ÿсен-тăран, выльăх-чĕрлĕх отрасльне аталантарассипе сулмаклă ĕçлет, хăвачĕсене анлăлатса пырать. Кĕçех Малтикас Ялтăрари выльăх-чĕрлĕх комплексĕнче икĕ ĕне вити хута каймалла.
«Санары» агрофирма 21-мĕш вырăнтан 10-мĕш йĕркене çити хăпарнине те ырă пулăмсемпе сăлтавламалла. Кăтартăвĕсем аван. Хуçалăх вăрлăх хатĕрлессипе аван ĕçлет, тĕш тырăсенчен, çĕрулмирен пысăк тухăç илет. Кунта тимлекенсем ытти хуçалăхрипе танлаштарсан чи пысăк шалу илеççĕ. Ертÿçи – Чăваш Республикин ял хуçалăхĕн тава тивĕçлĕ ĕçченĕ Роберт Петров.
К.Маркс ячĕллĕ хуçалăх вунтăххăрмĕш позицире вырнаçнă. Пĕлтĕр кунта пĕрчĕллĕ культурăсенчен рекордла тухăç илнĕ – 44,9 центнер. Кашни ĕнерен 3890 кг сĕт суса илнĕ, 100 пуç ĕнерен 95 пăру илнĕ. Валерий Шумилов ертсе пыракан хуçалăх элита вăрлăхне çитĕнтерессине пысăк тимлĕх уйăрать.
Рейтинга çавăн пекех «Мураты» (Геннадий Спиридонов), «Луч» (Вячеслав Ижелеев), «Янгорчино» (Геннадий Романов), «Победа» (Алевтина Семенова), «Агрохмель» (Борис Семенов), «Кольцовка» (Олег Кошкин) хуçалăхсем кĕнĕ.
С.ЧИКМЯКОВА.