01 июля 2015 г.
Вăрнарти ял хуçалăх техникумĕнчи волонтер ушкăнĕшĕн – ун йышĕнче 16 çамрăк – кăçалхи çул çав тери ĕçлĕ иртет. Студентсем вĕренсе тухса кайнипе çулсерен команда çĕнелет пулин те ырă ĕçсен шучĕ чакмасть.
Ачасем Тăван çĕршывăн Аслă вăрçин, тыл, педагогика ĕçĕн ветеранĕсене пулăшаççĕ, историпе культура палăкĕсене пăхса тăраççĕ, субботниксене, сывă пурнăç йĕркине пропагандăлакан акцисене хутшăнаççĕ тата ытти те.
Апрельте акă вĕсем Георгий хăйăвне валеçес акцире хастар пулчĕç. Аслă Çĕнтерÿ кунĕ умĕн Çĕнтерÿ ялавĕ умĕнче хурал тăчĕç, Пĕтĕм Раççейри акци йĕркипе педагогсемпе пĕрле техникум çывăхĕнче «Çĕнтерÿ сиренĕ» аллея хыврĕç.
СПИДран вилнисене асăннă кун, май уйăхĕн 28-мĕшĕнче, пĕрремĕш курссемпе «Пĕлме тивĕç!» калаçу сехечĕсем йĕркелерĕç, поселокра ку акци пирки пĕлтерес тĕллевпе информаци буклечĕсем валеçрĕç. Çак кунах Вăрнарта пурăнакансене чĕлĕм туртма пăрахма йыхравларĕç, буклет çумне хĕстернĕ канихветсем чĕнÿ вырăнне пулчĕç.
Иртнĕ эрнере вара волонтерсем, студентсем, преподавательсем флэшмоб-акци урлă наркомани те этемлĕхĕн тăшманĕ пулнине çирĕплетрĕç.
Техникумри волонтерсен юхăмне Надежда Викторовна Бурмистрова ертсе пырать. Команда «21-мĕш ĕмĕрти çамрăксем» ятпа çÿрет.
С.СВЕТЛОВА.