01 июля 2015 г.
Районти культура çурчĕ çумĕнчи ветерансен хорĕн пултарулăхне районта çеç мар, республикăра та аван пĕлеççĕ. Ку çеç те мар, вĕсем аякри хуласене те тухса çÿреççĕ.
Виçĕмçул аслă ÿсĕмри артистсем Смоленскра, пĕлтĕр Мускавра пулнăччĕ. Кăçал вара пирĕн ушкăна Тутарстан Республинчи «Уява» чĕнчĕç. Вăл Нурлат хулинче иртрĕ. Унта Атăл тăрăхĕнчи чылай коллектив пуçтарăннă. Пирĕн хор пултарулăхне 1-мĕш степеньлĕ Дипломпа палăртрĕç.
Халăх хорĕ çывăхри Егоркино салинче те концерт кăтартрĕ. Зал лăк тулли пухăннă. Номерсем вырăнти «Шÿлкеме» ансамблĕн юрри-ташшипе черетленчĕç.
Çак çулçÿрев халăхсен культурине çывăхлатма, хамăрăн наци культурине сыхласа хăварма май парать.
Халăх хорне çÿрекенсем чăваш йăли-йĕркине, юррисене аталантарма пулăшакан çынсене чĕререн тав тăваççĕ.
В.СЕМЕНОВ.