01 июля 2015 г.
Çĕршывăн пултаруллă, вăйлă кĕрешÿçĕ-хĕрсем иртнĕ эрнере Раменскра Раççей спартакиадин финалне пуçтарăннă.
Пĕрлештернĕ команда йышĕпе Вăрнар тăрăхĕн хĕрĕсем те Чăваш ен чысне хÿтĕленĕ. Мăн Турханти Надя Красновапа Тĕмпекри Наталья Дмитриева иккĕшĕ те Çĕнĕ Шупашкарти олимп резервисен училищинче вĕренеççĕ. Атăл тăрăхĕнчи федераллă округ первенствин çĕнтерÿçисем Раççей шайĕнче те пысăк ăсталăх кăтартнă. Харпăрхăй виçе категорийĕнче 30 ытла спортсмен хушшинче иккĕшĕ те бронза медальсене тивĕçнĕ. Хĕрсен пĕрремĕш тренерĕ – Чăваш Республикин тава ивĕçлĕ тренерĕ Виталий Трофимов.
Вăрнар район кĕрешÿçисем Раççей шайĕнчи ăмăртусенче час-часх палăраççĕ: Рома Львов, Никита Львов, Антон Сантимер, Яна Лукина, ыттисем.
Вăрнарсен тренерĕсем те маттур. Вĕсене тĕрлĕ ăмăртусене хаклама чĕнеççĕ. Республика кунĕнче Юрий Львов Чăваш Республикин тата Канаш районĕн кĕрешÿçисем хушшинчи матч тĕлпулăвĕнче судьяра ĕçленĕ.