17 июня 2015 г.
Район администрацийĕн пуçлăхĕн тивĕçĕсене пурнăçласа пыракан Вячеслав Горбунов ирттернĕ черетлĕ планеркăра Вăрнарти хытă каяшсен полигонĕпе çыхăннă, çавăн пекех тăлăх ачасене хÿтлĕхе илес тата ытти ыйтусене пăхса тухрĕç.
Иртнĕ эрнере районта Чăваш Республикин Çутçанталăк ресурсĕсен тата экологи министрĕн тивĕçĕсене пурнăçлакан Евгений Юшин пулнă. Тĕлпулура хытă каяшсен районти полигонне патшалăх реестрне кĕртес ыйтăва çĕкленĕ. Кун валли документсене Росприроднадзорăн республикăри управленине тăратнă. Çавăн пекех Вăрнарти шыв хранилищине ĕçмелли пахалăхлă шыв çăлкуçĕ статус парас ыйту та çивĕч тăрать. Хальхи вăхăтра ăна влаç органĕсем сÿтсе яваççĕ.
Июнь пуçламăшĕ тĕлне районта хÿтлĕхсĕр юлнă ачасем 132 шутланаççĕ. Пилĕк уйăхра ку шута 9 ачана илнĕ. Вĕсене пурне те çемьесене вырнаçтарнă. Хальхи вăхăтра 75 ача опекăпа попечительство хÿтлĕхĕнче, 56-шĕ – усрав çемьесенче çитĕнеççĕ, пĕри професси учрежденийĕнче вĕренет.
Пурăнмалли условисене лайăхлатма тăлăхсем черетре 56-ăн тăраççĕ. Вăрнарти Ленин урамĕнче вĕсем валли 12 хваттерлĕ, Мичурин урамĕнче икĕ хваттерлĕ çуртсем çĕкленеççĕ.
Ларура çавăн пекех пенси фондне тÿлевсем хывман предприятисем, çынсене кредитсем уйăрасси пирки калаçрĕç.
Хамăр инф.