17 июня 2015 г.
Раççей кунĕ ячĕпе районта тĕрлĕ мероприятисем иртрĕç. Культура çурчĕн ĕçченĕсем Вăрнарти кану паркĕнче концертпа савăнтарчĕç. Çамрăк граждансем вара чаплă лару-тăрура хăйсен тĕп документне – паспорта – илчĕç.
Маларах вăрнарсен Акатуйне хутшăннă май, Чăваш ен Пуçлăхĕ Михаил Игнатьев 14 çул тултарнă ултă çамрăка – Максим Никифорова, Евгений Никифорова, Андрей Варламова, Александр Малышова, Артемий Магушова тата Ольга Митрофанована – паспортсем парса чысланăччĕ.
Хальхинче ЗАГС пайĕнче вĕсене Вăрнарти Богдан Егоров тата Леонид Канюков тивĕçнĕ.
Паллă пулăмпа каччăсене район администрацийĕн пуçлăхĕн заместителĕ – пай пуçлăхĕ Николай Петров, Раççей миграци службин Вăрнарти пункчĕн инспекторĕ Евгений Волков, ЗАГС пуçлăхĕ Татьяна Филиппова саламланă.
Хамăр инф.
Раççей кунĕнче «Август» Фирмăн «Вăрнарти хутăш препаратсен завочĕ» филиалĕ хăйĕн ветеранĕсем валли çулçÿрев йĕркелерĕ. Çĕршыв историйĕпе мăнаçланма хистекен уявра историлле пулăмпа асра юлнă хулана суйласа илчĕç.
Ветерансем Свияжскра пулнă. Паллă ĕнтĕ, ăна Иван Грозный вăхăтĕнче Хусана туртса илме çĕкленĕ. Завод ветеранĕсем истори музейĕнче, храмсенче пулчĕç.
Л.Иванова.