09 июня 2015 г.
Республикăра фитнес-аэробикăпа профессионаллă ĕçлеме тытăннăранпа чылай район-хула ку юхăма хутшăнчĕ. Вăрнар районĕн спортсменĕсем маларах та, халĕ те – фитнес-центр ĕçлеме пуçланăранпа – тĕрлĕ ăмăртусен пьедесталĕ çинчен анмаççĕ.
Иртнĕ эрне вĕçĕнче Шупашкарта иртнĕ Пĕтĕм Раççейри турнирта вĕсем Мускав, Самар облаçĕсенчи, Тутарстан, Пушкăртстан, Мари Эл, Удмурт республикисенчи, Пенза, Самара, ытти хуласенчи (пĕтĕмпе 89 команда) командăсемпе тупăшнă.
Ăмăрту шайĕ, тупăшаслăхĕ каламасăрах паллă. Анчах та вăрнарсем парăнман. Ачасемпе çамрăксен спорт шкулĕн «Джэм» ушкăнĕ юниорсем хушшинчи «аэробика петит» номинацире чемпион пулса тăнă. «Некст-химик» кадетсен ушкăнĕнче степ-аэробика петитра иккĕмĕш пулнă. «Некст» ушкăн аэробикăра – тăваттăмĕш вырăнта. Тренерĕ – Елена Валерьяновна Аликова.
С.ЧИКМЯКОВА.