10 июня 2015 г.
Чăваш ен наркополицейскийĕсем Пĕтĕм Раççейри акцие хутшăнса «Каç-2015» оперативлă профилактика мероприятийĕ йĕркеленĕ.
Оперативниксен пилĕк ушкăнĕ преступлени тума пултаракан çынсем пухăнакан вырăнсенче тĕрĕслевсем ирттернĕ. Наркотĕрĕслев управленийĕн ĕçченĕсем çамрăксем йышлă пухăнакан вуникĕ заведение çитнĕ. «Каç» профилактика операцийĕ вăхăтĕнче çирĕм ытла çынна тытса чарнă, наркотиксен саккунсăр çаврăнăшĕпе çыхăннă пилĕк преступление тупса палăртнă. Сахал мар наркотик туртса илнĕ. Федераци шыравĕнче шутланакан пĕр çынна тупнă. Административлă право йĕркине пăснă 14 тĕслĕхе шута илнĕ.
Операци каçхи клубсем халĕ те пысăк хăрушлăх кăларса тăратакан вырăнсем шутланнине çирĕплетсе панă. Çамрăксем йышлă пухăнакан вырăнсене тĕрĕсленин тĕллевĕ наркотиксене тата психотроплă япаласене салатакансене тупса палăртса явап тыттарасси кăна мар, çамрăксем хушшинче «шурă вилĕме» сарăлма пулăшакан сăлтавсене пĕтересси те.
Çакăн йышши рейдсене малашне те ирттерĕç.