03 июня 2015 г.
Район администрацийĕн пуçлăхĕ Леонид Николаев ирттерекен черетлĕ планеркăра иртнĕ эрнери ĕç-хĕле пĕтĕмлетнипе пĕрлех хумхантаракан ыйтусене те пăхса тухрĕç.
Вăрнарти ачасемпе çамрăксен спорт шкулне акă тренерсем çитмеççĕ, çавăн пекех вĕрентÿпе пурлăх бази чухăн. Паянхи куна ачасем (пĕтĕмпе 1090) кунта спортăн 12 тĕсне алла илеççĕ. Пĕлтĕр сывă пурнăç йĕркине явăçнисен шучĕ ÿснĕ. Спорт шкулĕ пурнăçăн йывăр лару-тăрăвне лекнĕ, учетра тăракан ачасене те спортпа туслаштарма тăрăшать.
Çитĕнĕвĕсем те пур. Пĕлтĕр пĕр ача Раççей спорт мастерĕн нормативне тултарнă, тепри – Раççей спорт мастерĕн кандидачĕнне. 34 вĕренекен пĕрремĕш разряд илнĕ.
Çурхи уй-хир ĕçĕсем вĕçленнĕ май, ку шăматкун районта Акатуй уявĕ пулать. Леонид Николаев ăна йĕркеллĕ хатĕрленсе ирттерме хушусем пачĕ.
Кăçал чăваш классикĕ Константин Иванов çуралнăранпа 125 çул çитнине анлă паллă тăватпăр. Вăрнар делегацийĕ акă нумаях пулмасть поэт çуралнă ялта – Пушкăртстан республикинчи Пелепей районĕнчи Слакпуçĕнче – пулнă. Ку йыша район администрацийĕн пуçлăхĕн заместителĕ – пай пуçлăхĕ Николай Петров тата Ольга Куликова çыравçă, предприяти директорĕ те кĕнĕ.