03 июня 2015 г.
«Кольцовка» агрофирмăра иртнĕ районти конкурсра ĕнесене машинăпа сăвакан чи лайăх операторсене тата ĕнесене искусствăлла майпа пĕтĕлентерекен чи маттур техниксене палăртнă.
Операторсенчен çĕнтерÿ пьедесталне кăçал та «Янгорчино» хуçалăхри Алевтина Тарасова йышăннă. Ытти çулсенчи Вăрнар тата республика чемпионки район чысне Чăваш ен шайĕнче кăçал та ăнăçлă хÿтĕлес шанăç пур.
«Кольцовка» агрофирмăн доярки Валентина Козякова иккĕмĕш, «Броневикри» Ольга Козлова виççĕмĕш вырăнсенче. Чи çамрăк участник та, чи асли те Вăрнарти аш-какай комбинатĕнчен: Оксана Шумилова тата Валентина Лаврентьева.
Техник-осеменаторсем хушшинчи çĕнтерÿçĕне те районта-республикăра аван пĕлеççĕ. «Янгорчинăра» тимлекен Надежда Сергеева Пĕтĕм Раççейри конкурсра пĕр çулхине кĕмĕл призер пулнăччĕ.
К.Маркс ячĕллĕ хуçалăхри Вероника Смирнова иккĕмĕш, аш-какай комбинатĕнчи Нина Лукина виççĕмĕш вырăнсенче. Чи çамрăк ăста – Валентина Кузьмина, Фадеев фермер хуçалăхĕнче тимлет. Ветерансенчен чи маттурри – Галина Росадина, «Кольцовка» ĕçченĕ.