30 мая 2015 г.
Çак сăмахсене Елена Феоктистовна Сергеева ахальтен каламасть. Районти инвалидсен обществине ертсе пынă вăхăтра ăна хевтесĕр çынсен ыйтăвĕсене татса пама чылай пуçлăх-ертÿçĕ, предприниматель патне тухма тивнĕ. «Хирĕçлекен пулманни чуна хăпартатчĕ», – тет вăл.
Кăçал сăваплă ĕçпе тимлекен организаци пуçлăхĕн эстафетине Елена Феоктистовна çамрăкрах çынна пачĕ. «Владимир Викторов çынсемшĕн ырă ĕç чылай тăвать, обществăна та йĕркеллĕ ертсе пырĕ», – тет вăл.
Елена Феоктистовна ку ĕçре çичĕ çул ытла вăй хучĕ. Инвалидсен нуши-тертне, ыйтăвĕсене çав тери чĕре çывăхне илекенскер. Темиçе çул каялла Калининăра пурăнакан илтменнипе сусăра тухнă Вова Киселевăн çурт-йĕр условийĕсене лайăхлатассишĕн чылай çунчĕ. Шел те, ыйтăвĕ майлă татăлмарĕ. Хăйĕнчен кăна килнĕ пулсан-и;..
Районти инвалидсен обществи пурте усă курма юрăхлă хутлăх йĕркелес ĕçе пысăк тÿпе хыврĕ. Чылай предприяти-организацие кĕме пандуссем вырнаçтарчĕç. Анчах та Елена Феоктистовнана пĕр ыйту халĕ те канăç памасть. Ку вăл – коляскăпа çÿрекен хăш-пĕр инвалид пачах урама тухайманни. Пĕрне-теприне тăванĕсем укçалла йăттарса тухкалаççĕ-ха. Анчах та тăватă стенара пурăнакансем те пур.
Нумай хваттерлĕ çуртсенче сусăрсене кĕрсе тухма условисем пăхманнипе çыхăннă ĕнтĕ çакă. Çĕнĕ Шупашкарта пĕр инвалид ку енĕпе тăратнă çăхава суд тивĕçтернĕ. 1-мĕш хутра пурăнаканскере, кÿмепе балконран тухса çÿреме подъемник вырнаçтарса панă.
Сăмах май калас-тăк, районти 2 пин те 300 инвалидран 26-шĕ колясочниксем. Тухса çÿреме пултаракансем ав инвалидсен обществи ирттерекен мероприятисене те хастар хутшăнаççĕ. Пĕлтĕр коляскăсемпе йĕркеленĕ чупура вуннăн ытла тупăшнăччĕ.
Мероприятисем тенĕрен, районти общество сусăрсен пурнăçне хаваслăх кĕртес, пĕр-пĕринпе хутшăнтарас тĕллевпе чылай ĕç пурнăçлать. Пулă та тытаççĕ вĕсем, шашка-шахматла ăста выляççĕ, дартсра тĕл переççĕ, пауэрлифтингра вăй виçеççĕ. Юлашки икĕ çулта Скандинави уттине кăмăллакансен шучĕ ÿснĕ.
Фестивальсенче мĕнлерех маттур тата; Калининăри шкул-интернатра вĕренекенсем, психикăпа неврологи интернатĕнче пурăнакансем пултарулăх номерĕсемпе час-час тĕлĕнтереççĕ. Хирпуçĕнчи Алевтина Николаева, Вăрнарти Вероника Степанова, Кĕçĕн Кипек тăрăхĕнчи Владимир Кузьмин, Анна Пескова, ыттисем ал ĕçĕсемпе куравсене илемлетеççĕ. Пĕр сăмахпа – вĕсем пултарулăхра сусăрлăх чăрмав мар пулнине çирĕплетеççĕ.
Елена Феоктистовна хăйĕн калаçăвĕнче спонсорсем патне çине-çинех таврăнни ăнсăртран мар. Çак мероприятисене хутшăнма, общество пÿлĕмĕнче юсав ирттерме районти чылай предприяти пулăшнă-çке. Вĕсене вăл чĕререн тав тăвать. Социаллă хÿтлĕх пайĕпе, социаллă тивĕçтерÿсен центрĕпе, райадминистрацин социаллă аталану пайĕпе, ветерансен, куç курманнисен обществисемпе тачă çыхăнса ĕçленĕ. Çакă Елена Феоктистовнан ырă, уçă кăмăлĕпе те çыхăннă пулĕ.
Хăй вăл Патăрьел районĕнче вăрçă хыççăн çуралнă. Йывăр пурнăçра çитĕннĕ пулин те шăпине нихăçан та ÿпкелемен. Виçĕ ача çуратса аслă пĕлÿ илме пулăшнă. Паян мăнукĕсемпе пуян – вĕсем улттăн.
Пушă вăхăтра чечексемпе аппаланни профессийĕпе ял хуçалăх çынни пулнипе çыхăннă ахăртнех, ку тытăмра 38 çул тăрăшнă вăл. Яланах хисепре пулнă, грамотăсем чылай. «,çри хастарлăхшăн» медале тивĕçнĕ. «ĕç ветеранĕ» ята илнĕ. Хăй вăхăтĕнче ял хуçалăх управлени ĕçченĕсен профкомĕн председателĕ те пулнă, спорт ăмăртăвĕсене хастар хутшăннă. Халь те ахаль лармасть, обществă ĕçĕнче активлă.
С.ЧИКМЯКОВА.