27 мая 2015 г.
Туçи-çармăссене патшалăх чиккисене сыхлама мĕн авалтан килĕштерсе явăçтарнă. Чыслă та йывăр службăна тивĕçнисене ятарлă комисси витĕр кăларнă. Ку йăла-йĕркене паянхи куна çитичченех çирĕп тытса пыраççĕ.
Иртнĕ хаяр вăрçă вăхăтĕнче пирĕн ялти Иван Захаров (Сахăр Вани) çак службăра тăнăран палăрнă. Вăл Совет Союзĕпе Иран хушшинчи патшалăх чиккине сыхланă. Каярахпа, çитмĕлмĕш çулсен пуçламăшĕнче, Брест крепоçне сыхлама Леонид Петровăн шăпа тухнă. Вăл унта икĕ çул хуралланă хыççăн киле таврăнсан шăллĕне Володьăна Китай чиккине сыхлама ăсатаççĕ. Эстафета малалла тăсăлнă евĕрлĕ, кĕçех унăн иккĕмĕш сыпăкри шăллĕн Герман Адриановичăн салтака кайма ят тухать. Шăпи Туркмени çĕрĕ çинчи Кушка хулине илсе çитерет. Икĕ çул çак чикĕре çивĕч тăнă хыççăн тăван яла таврăнать. Вĕренсе тухса алла аслă пĕлÿ дипломĕ илнĕ май Туçи Çармăс шкулĕнче физкультура учителĕнче ĕçлет. Малтанхи çулах шкулта çамрăк пограничниксен отрядне йĕркелесе ярать. Шел, ĕмĕрĕ кĕске пулчĕ, автоаварие пула пирĕнтен ĕмĕрлĕхех кĕтмен çĕртен уйрăлчĕ. Пуçăннă ĕçне вĕренекенĕсем пăрахăçламарĕç. Отряда унăн ятне панă. Командирне пултаруллă хĕрпĕрчине Снежанна Филипповăна суйланă.
Петровсен – пограничниксен йăх-ăрăвĕ малалла тăсăлчĕ. Алексей Васильевич Псков облаçĕнчи Пыталово патĕнче икĕ çул Латви чиккинче сыхă тăрать. Унăн Дима шăллĕ 2006 çултанпа Бурятире Кяхта хулинче чикĕ хуралĕнче. 1942 çулта Тăван çĕршывшăн пуçне хунă аслашшĕн ятне çĕре ÿкермеççĕ мăнукĕсем.
Туçи Çармăс шкулĕн коридорĕнче пограничниксен ячĕпе ятарлă стенд вырнаçтарнă.
В.ПЕТРОВ.
Туçи Çармăс.